AKP ភ្នំពេញ ថ្ងៃទី២៤ ខែមីនា ឆ្នាំ២០២២ -- ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានស្វាគមន៍ និងឱ្យក្រុមហ៊ុន Huawei បន្តជួយបណ្ដុះបណ្ដាលធនធាមនុស្ស និងបន្តធ្វើយ៉ាងណាឱ្យកម្ពុជាទទួលបាននូវបច្ចេកវិទ្យាចុងក្រោយបំផុត។

នេះបើតាមការឱ្យដឹងរបស់ឯកឧត្ដម អ៊ាង សុផ្លែត ជំនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យលោក Lin Bai feng ប្រធានក្រុមហ៊ុន Huawei ប្រចាំតំបន់ប៉ាស៊ីហ្វិក ចូលជួបសម្ដែងការគួរសម នាព្រឹកថ្ងៃទី២៤ ខែមីនា ឆ្នាំ២០២២ នៅវិមានសន្តិភាព។ នៅក្នុងជំនួបនោះ  លោក Bai feng  បានគោរពនិងថ្លែងអំណរគុណជូនចំពោះសម្ដេចតេជោ ចំពោះការគាំទ្រក្រុមហ៊ុនរបស់លោករយៈពេលជាង២៣ឆ្នាំកន្លងមក និងផ្ដល់នូវការទុកចិត្តដល់ក្រុមហ៊ុន និងអនុញ្ញាតឱ្យក្រុមហ៊ុនចូលរួមចំណែកក្នុងការអភិឌ្ឍវិស័យបច្ចេកវិទ្យា ទាំងក្នុងវិស័យសុខាភិបាល ប្រយុទ្ធប្រឆាំងការរីករាលដាលជំងឺកូវីដ១៩ និងលើវិស័យដទៃទៀត។ លោក  Bai feng បានមានប្រសាសន៍ថា សេដ្ឋកិចឌីជីថលនៅកម្ពុជាមានការរីកចម្រើនយ៉ាងខ្លាំង ដោយកម្ពុជាមានការប្រើប្រាស់ប្រព័ន្ធព័ត៌មានវិទ្យាស្ទើរគ្រប់វិស័យ។ ក្នុងន័យនេះ លោក Bai feng ក៏បានគោរព និងសុំការគាំទ្រពីសម្ដចតេជោ ចូលរួមចំណែកអភិវឌ្ឍន៍វិស័យព័ត៌មានវិទ្យា តាមរយៈការអភិវឌ្ឍធនធានមនុស្ស នាំមកនូវបច្ចេកវិទ្យាចុងក្រោយបំផុតមកកម្ពុជា និងរៀបចំហេដ្ឋារចនាសម្ព័ន្ធតភ្ជាប់បណ្ដាញព័ត៌មានវិទ្យា និងតភ្ជាប់រវាងប្រជាជននិងប្រជាជនប្រកបដោយសុវត្ថិភាព និងអធិបតេយ្យភាព។ ឆ្លៀតក្នុងឱកាសនោះដែរ លោក  Bai feng ក៏បានគោរពផ្ដល់ជូនសម្ដេចតេជោ នូវគ្រឿងបរិក្ខារ និងកុំព្យូទ័រ ចំនួន៥០០គ្រឿងផងដែរ។

ជាការឆ្លើយតប សម្ដេចតេជោនាយករដ្ឋមន្ត្រីបានថ្លែងអំណរគុណជូនចំពោះ លោក  Bai feng ដែលកន្លងមកបានផ្ដល់ជូនកម្ពុជានូវគ្រឿងបរិក្ខារ សម្រាប់ប្រយុទ្ធប្រឆាំងនិងជំងឺកូវីដ១៩ និងនៅពេលនេះបានផ្ដល់ជូននូវគ្រឿងបរិក្ខារ សម្រាប់ការតភ្ជាប់សម្រាប់ការប្រជុំតាមប្រព័ន្ធវីដេអូផង និងកុំព្យូទ័រផង។

សម្ដេចតេជោនាយករដ្ឋមន្ត្រី បានស្វាគមន៍ និងលើកទឹកចិត្តឱ្យលោក  Bai feng បន្តធ្វើការជាមួយឯកឧត្ដមរដ្ឋមន្ត្រីក្រសួងប្រៃសណីយ៍ និងទូរគមនាគមន៍ បន្តជួយបណ្ដុះបណ្ដាលធនធាមនុស្ស និងបន្តធ្វើយ៉ាងណាឱ្យកម្ពុជាទទួលបាននូវបច្ចេកវិទ្យាចុងក្រោយបំផុត ដែលធានាបាននូវសុវត្ថិភាព និងអធិបតេយ្យភាពព័ត៌មានផង និងមានការប្រកួតប្រជែងនៅលើពិភពលោកផង៕

ដោយ ជឹម ណារី