AKP ភ្នំពេញ ថ្ងៃទី២៩កញ្ញា ២០២១ -- ធនាគារអភិវឌ្ឍន៍អាស៊ី (ADB)​ បាន​អនុម័តប្រាក់កម្ចីចំនួន៨២លានដុល្លារ​ដើម្បីកែលម្អ​ផ្លូវ​ជាតិ និងផ្លូវខេត្តប្រវែង៤៨គីឡូម៉ែត្រក្នុងខេត្តព្រៃវែង និងខេត្ដកណ្តាល​ដើម្បីជំរុញការ​អភិវឌ្ឍ​សេដ្ឋកិច្ច​ តាមច្រករបៀងសេដ្ឋកិច្ចមហាអនុតំបន់មេគង្គ (GMS)។ នេះបើយោងតាម​សេចក្ដីប្រកាសព័ត៌មានរបស់ ADB។

បើតាម ADB ជំនួយថ្មីនេះ គឺជាដំណាក់កាលទី២នៃគម្រោងធ្វើឱ្យប្រសើរឡើងនូវ​បណ្តាញផ្លូវថ្នល់ដែលមានគោលបំណងពង្រឹងការតភ្ជាប់កម្ពុជា​ជាមួយវៀតណាម​ និង​គាំទ្រ​​ការអភិវឌ្ឍគ្រឿងសម្របសម្រួល​ការ​ឆ្លងដែននៅក្នុងខេត្តទាំងពីរ។ ការធ្វើឱ្យប្រសើរថ្មី នេះនឹងប្រើប្រាស់ការរចនាដែលធន់នឹងគ្រោះមហន្តរាយ និងអាកាសធាតុ​ និងជួយឱ្យ ក្រសួងសាធារណការនិងដឹកជញ្ជូនគ្រប់គ្រងផ្លូវបានល្អប្រសើរដោយកាត់បន្ថយការផ្ទុក លើសចំណុះយានយន្តដែលជារឿយៗធ្វើឱ្យខូចផ្លូវ  និងនាំឱ្យមានការជួសជុលមុនពេល កំណត់។

លោក Mohammad Nazrul Islam អ្នកជំនាញផ្នែកដឹកជញ្ជូនរបស់ធនាគារអភិវឌ្ឍន៍​អាស៊ី​មាន​ប្រសាសន៍ថា​ ការដឹកជញ្ជូនតាមផ្លូវគោក​ គឺជាមធ្យោបាយចម្បងនៃចរាចរណ៍​ទំនិញនិងមនុស្សនៅក្នុងប្រទេសកម្ពុជានិងរវាងប្រទេសមហាអនុតំបន់ទន្លេមេគង្គ។ លោក បានបន្ដថា គម្រោងនេះនឹងពង្រីកលទ្ធភាពទទួលបានការអប់រំសេវាសុខភាពក៏ដូចជា​សេវា​កម្មសាធារណៈដទៃទៀតក្នុងចំណោមសហគមន៍មូលដ្ឋានជាពិសេសពលរដ្ឋក្រីក្រនៅតាមជនបទ។ លោកបានបញ្ជាក់ថា “វាក៏នឹងជួយតភ្ជាប់កាន់តែប្រសើរទៅនឹងទីផ្សារ​និងឱកាស​សេដ្ឋកិច្ចតាមរយៈបណ្តាញផ្លូវថ្នល់ប្រកបដោយប្រសិទ្ធភាពសុវត្ថិភាព និងភាពធន់នឹងអា កាសធាតុដែលតភ្ជាប់កម្ពុជាជាមួយវៀតណាមតាមច្រករបៀងសេដ្ឋកិច្ចខាងត្បូងនៃមហា អនុតំបន់មេគង្គ” ។

សូមជម្រាបថា សេដ្ឋកិច្ចកម្ពុជាបានកើនឡើង៧,៨ភាគរយ ក្នុងមួយឆ្នាំជាមធ្យម​ចាប់​ពី​ឆ្នាំ១៩៩៨ ដល់​ ឆ្នាំ២០១៩ ប៉ុន្តែបានធ្លាក់ចុះ៣,១ភាគរយ នៅឆ្នាំ២០២០​ដោយសារ​ជំងឺរាតត្បាតកូវីដ១៩។ ទន្ទឹមនេះ វិស័យដឹកជញ្ជូនរបស់ប្រទេសប្រឈម​នឹងបញ្ហាដូច​ជា​ការវិនិយោគលើហេដ្ឋារចនាសម្ព័ន្ធមិនគ្រប់គ្រាន់​ និងបញ្ហានិរន្តរភាព។ ផ្លូវជនបទ និងផ្លូវ ខេត្តភាគច្រើនរបស់កម្ពុជាមិនទាន់ឈួសឆាយ​ ហើយសមត្ថភាពផ្លូវជាតិមានកំណត់។

លោក Mohammad Nazrul Islam បានលើកឡើងថា ដើម្បីដោះស្រាយបញ្ហា​ប្រឈម​ទាំងនេះ​ រាជរដ្ឋាភិបាលបានបង្កើតផែនការជាតិមួយដើម្បីកសាងហេដ្ឋារចនា​សម្ព័ន្ធដែល​មាន​គុណភាពខ្ពស់​ និរន្តរភាព និងភាពធន់នឹងអាកាសធាតុដែលអាចបំពេញតម្រូវការ​ប្រជាពលរដ្ឋ និងកំណើនការងារអំឡុងឆ្នាំ២០៣០។ ផ្លូវកសាងក្នុងគម្រោងថ្មីនេះ​ ត្រូវបាន​បញ្ចូលក្នុងបញ្ជីគម្រោងផែន​ការ​ជាតិនេះ។

ជាមួយគ្នានេះដែរ ក្នុងដំណាក់កាលទី១នៃគម្រោង​ ដែលត្រូវបានអនុម័តដោយADB ក្នុងឆ្នាំ២០១៧ គ្របដណ្តប់លើផ្លូវជាតិចំនួន១៤៧គីឡូម៉ែត្រ ក្នុងខេត្តព្រៃវែង សៀមរាប និង ខេត្ដស្វាយរៀង តាមច្រករបៀងសេដ្ឋកិច្ចខាងត្បូងនៃមហាអនុតំបន់មេគង្គ។ ក្នុង​ដំណាក់​កាលទី២ ការកែលម្អផ្លូវជាតិ នឹងបង្ហាញពីការចំណាយប្រកបដោយប្រសិទ្ធភាព​ និរន្តរភាព និងបច្ចេកទេសជីវសាស្រ្តដែលមិនប៉ះពាល់ដល់បរិស្ថានរួមទាំងការការពារទំនប់ និង ជម្រាល។ ការធ្វើឱ្យប្រសើរឡើងនូវផ្លូវខេត្ត នឹងប្រើអង្គធាតុដីរាវដែលមិនប៉ះពាល់ដល់ បរិស្ថានដើម្បីជួយពង្រីកការប្រើប្រាស់​វត្ថុធាតុដើមដែលមាននៅក្នុងស្រុក។

បើតាមលោក Mohammad Nazrul Islam គម្រោងនេះ ក៏មានគោលបំណង​ជួយ​ក្រសួងសាធារណការ និងដឹកជញ្ជូនកែលម្អ ការគ្រប់គ្រងផ្លូវថ្នល់និងអភិវឌ្ឍន៍របៀប​ថែទាំ​ផ្លូវប្រកបដោយនិរន្តរភាព​ ដោយប្រើប្រាស់កិច្ចសន្យាថែទាំផ្លូវថ្នល់ដែលមានប្រសិទ្ធភាព ហើយ​ក៏នឹងបង្កើនការយល់ដឹង​អំពីសុវត្ថិភាពនិងសុខភាពផ្លូវថ្នល់ក្នុងសហគមន៍ដែលមាន​ការ​អនុវត្តគម្រោងនេះ។

លោកបានបន្ថែមថា “គម្រោងផ្លូវនេះ អនុវត្តន៍តាមយុទ្ធសាស្ត្រភាពជាដៃគូប្រចាំ​ប្រទេសរបស់ ADB សម្រាប់ប្រទេសកម្ពុជាដែលមានគោលបំណងជួយប្រទេសក្នុងការកែ​លម្អការប្រកួតប្រជែង និងធ្វើពិពិធកម្មសេដ្ឋកិច្ច។ គម្រោងនេះក៏ជាការអនុវត្ត​បន្តនៃកម្ម​វិធីផ្លូវ និងផ្លូវដែករបស់ADB នៅក្នុងប្រទេសកម្ពុជាផងដែរ”៕

ដោយ រិទ្ធី ប្រភព៖ ADB