AKP ភ្នំពេញ ថ្ងៃទី២១ ខែកក្កដា ឆ្នាំ​២០២១--ឯកឧត្តម កែន រដ្ឋា អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ ប្រធានប្រតិភូតំណាងក្រសួងសាធារណការនិងដឹកជញ្ជូន និងលោកជំទាវ ឈិន ដាលីន អគ្គនាយករង នៃអគ្គនាយកដ្ឋានថវិកា និងជាប្រធានប្រតិភូតំណាងក្រសួងសេដ្ឋកិច្ច និងហិរញ្ញវត្ថុ បានដឹកនាំកិច្ចប្រជុំអន្តរក្រសួងពិភាក្សាកម្រិតបច្ចេកទេសថវិកា សម្រាប់ឆ្នាំ២០២២ តាមរយៈប្រព័ន្ធវីដេអូពីចម្ងាយ (Zoom Video Conference) កាលពី​ថ្ងៃ១១កើត ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ត្រូវនឹងថ្ងៃអង្គារ ទី២០ ខែកក្កដា ឆ្នាំ២០២១ ។

កិច្ចប្រជុំនេះដើម្បី​ពិនិត្យ ពិភាក្សាលើផែនការយុទ្ធសាស្រ្តថវិកាឆ្នាំ២០២២-២០២៤ និងពិភាក្សាលើគម្រោងចំណូល-ចំណាយថវិកាសម្រាប់ឆ្នាំ២០២២ របស់ក្រសួងសាធារណការនិងដឹកជញ្ជូន ដើម្បីឆ្លុះបញ្ចាំងពីទិដ្ឋភាពនៃការគ្រប់គ្រង ការប្រមូលចំណូល ការសម្របសម្រួលចំណាយ និងការប្រើប្រាស់ថវិកាជាតិប្រកបដោយប្រសិទ្ធភាព និងអាចចូលរួមសន្សំសំចៃថវិកាក្នុងបរិបទ នៃការរីករាលដាលជំងឺកូវីដ-១៩ ផងដែរ។

នៅក្នុង​ឱកាសនោះ ប្រធានប្រតិភូតំណាងក្រុមការងារបច្ចេកទេសថវិកា នៃក្រសួងទាំងពីរ បានគូសបញ្ជាក់ថា ដោយសារជំងឺកូវីដ-១៩ នៅតែបន្តរីករាលដាលរហូតដល់បច្ចុប្បន្ននេះ ក្រសួង​ទាំងពីរបានគិតគូរយ៉ាងហ្មត់ចត់ និងច្បាស់លាស់ អំពីការជ្រើសរើសសកម្មភាពអាទិភាពដើម្បីដាក់បញ្ចូលក្នុងទិសដៅការងារអនុវត្តន៍សម្រាប់ឆ្នាំ២០២២ ដោយបានរៀបចំផែន ការយុទ្ធសាស្ត្រថវិកាប្រចាំឆ្នាំ (BSP) គម្រោងផែនការថវិកា (BP) និងកិច្ចការពាក់ព័ន្ធនឹងថវិកា ស្របតាមច្បាប់ ស្តីពីហិរញ្ញវត្ថុសម្រាប់ការគ្រប់គ្រងប្រចាំឆ្នាំ សារាចរណែនាំ និងចក្ខុវិស័យវែងឆ្ងាយរបស់ប្រមុខរាជរដ្ឋាភិបាលកម្ពុជា ដើម្បីធ្វើជាមូលដ្ឋានដាក់បញ្ចូលក្នុងកិច្ចប្រជុំពិភាក្សាកម្រិតបច្ចេកទេសថវិកាសម្រាប់ឆ្នាំ២០២២នេះ និងសម្រាប់កិច្ចប្រជុំកម្រិតថ្នាក់ដឹកនាំ នាពេលបន្ទាប់ខាងមុខ។

ជាមួយគ្នានេះដែរ ប្រធានប្រតិភូតំណាងក្រុមការងារបច្ចេកទេសថវិកា នៃក្រសួងទាំងពីរ បានពិភាក្សាគ្នាប្រកបដោយស្មារតីយោគយល់ ទទួលខុសត្រូវខ្ពស់ និងប្រកបដោយផ្លែផ្កាលើការងារគ្រោងប្រមូលចំណូល និងការស្នើសុំគម្រោងចំណាយថវិកាឆ្នាំ២០២២ ទៅតាមជំពូក កម្មវិធី អនុកម្មវិធី គណនី អនុគណនី ដោយបានឯកភាពរួមគ្នាលើខ្ទង់ថវិកាអាទិភាពមួយចំនួនដែលបានស្នើ សម្រាប់ដាក់ស្នើជូនថ្នាក់ដឹកនាំ នៃក្រសួងសេដ្ឋកិច្ច និងហិរញ្ញវត្ថុ ជាមូលដ្ឋានក្នុងការពិនិត្យ និងសម្រេចនៅក្នុងកិច្ចប្រជុំកម្រិតថ្នាក់ដឹកនាំបន្តទៀត។ ដោយសារស្ថានភាពនៃការរីករាលដាលជំងឺកូវីដ-១៩ រាជរដ្ឋាភិបាលកម្ពុជាបានធ្វើវិចារណកម្មចំណាយថវិកាទៅតាមក្រសួង ស្ថាប័ន និងអង្គភាពរដ្ឋ ដើម្បីកាត់បន្ថយការចំណាយ និងរក្សាទុកកញ្ចប់ថវិកាមួយផ្នែក សម្រាប់ត្រៀមបម្រុងទុកប្រើប្រាស់តាមការចាំបាច់ផ្សេងៗ៕

ដោយ ទេស ច័ន្ទសុធារី (ប្រភព៖ ក្រសួង​សាធារណការ និង​ដឹកជញ្ជូន)