AKP ភ្នំពេញ ថ្ងៃទី១២ ខែឧសភា ឆ្នាំ២០២១ -- ឯកឧត្តម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ និងជាប្រធានប្រតិបត្តិចាក់វ៉ាក់សាំងកូវីដ-១៩ បានលើកឡើង​ពី​បញ្ហាលំបាកមួយចំនួនដែលក្រុមគ្រូពេទ្យចាក់វ៉ាក់សាំងដែលបានជួបប្រទះអំឡុងពេលនៃយុទ្ធនាការចាក់វ៉ាក់សាំងជូនប្រជាពលរដ្ឋនៅតំបន់ក្រហម ក្នុងរាជធានីភ្នំពេញ។

ថ្លែងក្នុងកម្មវិធីផ្សាយផ្ទាល់វេទិកាពិសេសស្ដីពីសកម្មភាព និងលទ្ធផលនៃ​ការអនុវត្ដ​ពាក់ព័ន្ធក្នុងការទប់ស្កាត់ការឆ្លងរីករាលដាលជំងឺកូវីដ១៩ និងការអនុវត្ដកម្មវិធីជំនួយសង្គម​ជាសាច់ប្រាក់តាមទូរទស្សន៍ជាតិកម្ពុជា នាល្ងាចថ្ងៃទី១២ ខែឧសភា ឆ្នាំ២០២១​ឯកឧត្ដម នាយ​ឧត្តមសេនីយ៍ ឥត សាវ៉ាត់ បានគូសបញ្ជាក់ថា ក្នុងយុទ្ធនាការចាក់វ៉ាក់សាំងជូន​ប្រជា​ពល​រដ្ឋនៅក្នុងតំបន់ក្រហមក្នុងរាជធានីភ្នំពេញនេះ គឺមានបញ្ហាលំបាកមួយចំនួនដែល​ប្រឈម ក្នុង​នោះរួមមាន៖ បញ្ហាសុវត្ថិភាពគឺជាបញ្ហាប្រឈមមួយដែលក្រុមគ្រូពេទ្យ និងប្រជាពលរដ្ឋ​ដែល​មកទទួលសេវាចាក់វ៉ាក់សាំងនេះត្រូវមានការប្រុងប្រយ័ត្នទាំងអស់។ ចំពោះអ្នកដែលមកចាក់​មិនដឹងខ្លួនថាខ្លួនមានផ្ទុកជំងឺកូវីដ១៩ ហើយមកចាក់វ៉ាក់សាំង​អ្នកខ្លះអំឡុងពេលដែលយក​សំណាកកូវីដ១៩ហើយ ប៉ុន្តែនៅតែមកចាក់វ៉ាក់សាំងទៀត។ ឯកឧត្ដម នាយឧត្តមសេនីយ៍ បានបន្ថែមទៀតថា ដោយឡែកករណីមួយចំនួនទៀត អ្នកដែលដឹងថាខ្លួនកើតកូវីដ១៩ហើយ និងកំពុងរង់ចាំក្រុមគ្រូពេទ្យដើម្បីបញ្ជូនទៅសម្រាកព្យាបាលនោះ បែរជាមកចាក់វ៉ាក់​សាំង​ទៀត ដែលទាំងអស់នេះ គឺជារឿងគ្រោះថ្នាក់ណាស់សម្រាប់ក្រុមគ្រូពេទ្យ និងប្រជាពលរដ្ឋ​ដទៃទៀតដែលមកទទួលសេវាចាក់វ៉ាក់សាំង។

តែយ៉ាងណាក៏ដោយចុះ ឯកឧត្ដម នាយឧត្តមសេនីយ៍ បានគូសបញ្ជាក់បន្ថែមថា ក្រុមគ្រូពេទ្យនឹងបន្តខិតខំប្រឹងប្រែងក្នុងការសម្រេចឱ្យបាននូវការចាក់វ៉ាក់សាំងជូនប្រជាពល​រដ្ឋនៅតំបន់ក្រហម ក្នុងរាជធានីភ្នំពេញដូសទី១ឱ្យបានចប់រួចរាល់នៅថ្ងៃទី១៥ ខែឧសភា ខាងមុខនេះ ហើយបើនៅសល់ទៀត គឺនឹងបន្តចាក់ឱ្យប្រជាពលរដ្ឋឱ្យបានគ្រប់ៗគ្នាផងដែរ ។

សូមជម្រាបជូនថា យុទ្ធនាការចាក់វ៉ាក់សាំងនៅតំបន់ក្រហមក្នុងរាជធានីភ្នំពេញ បាន​ចាប់ផ្តើមកាលពីថ្ងៃទី០១ ខែឧសភា ឆ្នាំ២០២១ ដោយប្រើរយៈពេល៣០ថ្ងៃ គ្របដណ្តប់​លើ​តំបន់មួយចំនួនក្នុងខណ្ឌចំនួន៤ រួមមាន ខណ្ឌពោធិ៍សែនជ័យ ខណ្ឌមានជ័យ ខណ្ឌកំបូល និងខណ្ឌដង្កោ។

ពាក់ព័ន្ធនឹងការងារចាក់វ៉ាក់សាំងនេះ សម្តេចពិជ័យសេនា ទៀ បាញ់ រដ្ឋមន្រ្តីក្រសួង​ការពារជាតិ បានលើកឡើងថា សម្តេចមានមោទកភាពចំពោះរាជរដ្ឋាភិបាល​ដែលបានប្រគល់​ភារកិច្ចនេះឱ្យក្រសួងការពារជាតិ ទទួលបន្ទុកចាក់វ៉ាក់សាំងជូនប្រជាពលរដ្ឋនៅតំបន់ក្រហម​នៃខណ្ឌទាំង៤ដែលមានហានិភ័យខ្ពស់នៃការឆ្លងជំងឺកូវីដ-១៩។ សម្តេចពិជ័យសេនា​បានបន្ត​ថា ភាពជោគជ័យនៃយុទ្ធនាការនេះអាស្រ័យលើការចូ​លរួមពីគ្រប់ភាគីពាក់ព័ន្ធ ក្នុងការរួមគ្នា​ជួយប្រជាពលរដ្ឋក្នុងគ្រាដ៏លំបាកនេះ ៕

ដោយ ចាន់ សុធីវង្ស