AKP ភ្នំពេញ ថ្ងៃទី០១ ខែឧសភា ឆ្នាំ២០២១​ --លោក ម៉ាកកូ ឡាំប៊រទីនី អគ្គនាយកនៃអង្គការ WWF អន្តរជាតិបានអំពាវនាវឱ្យមាន​សកម្ម​ភាពបន្ទាន់ដើម្បីដោះស្រាយវិបត្តិអាកាសធាតុ និងធម្មជាតិ ដើម្បីធានា បាននូវអនាគត​មួយ​ប្រកបដោយនិរន្តរភាពសម្រាប់មនុស្ស និងធម្មជាតិ។ ការអំពាវនាវនេះ ធ្វើឡើងក្នុង​ខណៈ​ពេល​​ដែលអង្គការ WWF ប្រារព្ធពិធីឈានចូលខួបគម្រប់ ៦០ ឆ្នាំ ដែលស្ថាប័នអភិរក្ស​ធំបំផុត​នៅលើ​សកលលោកលើវិស័យបរិស្ថាន។

លោក ម៉ាកកូ ឡាំប៊រទីនី បានគូសបញ្ជាក់ថា ដើម្បីដោះស្រាយវិបត្ដិអាកាសធាតុ និង​ធម្មជាតិ ត្រូវពង្រឹង កិច្ចសហការជាមួយរដ្ឋាភិបាលតួអង្គក្នុងវិស័យធុរកិច្ច និងសហគមន៍ យើងចាំបាច់ត្រូវធ្វើកិច្ចការជាច្រើនដើម្បី ឈានទៅសម្រេចលទ្ធផលបន្ថែមទៀតក្នុងរយៈពេល ១០ ឆ្នាំខាងមុខ ពោលគឺយើងត្រូវធ្វើកិច្ចការច្រើនជាង ពេលកន្លងមកទៀត។ លោកបាន​បញ្ជាក់​បន្ថែមថា “សព្វថ្ងៃនេះ យើងមើលឃើញកាន់តែច្បាស់ជាងពេលមុនៗ នូវមហន្តរាយ និងហានិភ័យនានា​ដែលកំពុងកើតឡើង ហើយយាយីយ៉ាងធ្ងន់ធ្ងរដល់ធនធានជីវចម្រុះ​នៃភព​ផែនដីយើង”។

បើតាមរបាយការណ៍វិទ្យាសាស្ត្របែបវិភាគ The Living Planet Report របស់អង្គការ WWF ចេញផ្សាយចុង ក្រោយគេបង្អស់ ស្តីពីស្ថានភាពនៃធនធានជីវចម្រុះសកល និងគុណ​ភាពនៃភពផែនដីបានបង្ហាញថា សត្វព្រៃ ចំនួន ២ ភាគ ៣ ជាមធ្យម បានបាត់បង់ក្នុងរយៈ​ពេល ៥០ ឆ្នាំ ចុងក្រោយនេះ ដែលវាបានបង្កជាផលវិបាក និងគំរាមកំហែងយ៉ាង​ខ្លាំងដល់​គុណភាពបរិស្ថាន អាកាសធាតុ អាហារ ប្រព័ន្ធទឹកសាប និងសុខភាព។

លោកអគ្គនាយកបានបន្ដថា វិបត្តិជំងឺឆ្លងផ្លូវដង្ហើមប្រភេទថ្មីកូវីដ១៩ ដែលកំពុង​បន្ត​យាយីដល់ សុខភាពមនុស្សនៅទូទាំង​សកលលោកនាពេលបច្ចុប្បន្ន គឺជាភស្តុតាងជាក់ស្តែង​បង្ហាញថា​ទង្វើគ្មាននិរន្តរភាពរបស់​មនុស្ស​ដូចជា ការផ្លាស់ប្តូរប្រភេទនៃការប្រើប្រាស់ដី ការ​បំផ្លាញព្រៃឈើ និងការជួញដូរ​សត្វព្រៃ កំពុងរុញច្រានប្រព័ន្ធអេកូឡូស៊ីធម្មជាតិរបស់ ដែល​គាំទ្រដល់ជីវិតនៅ លើភពផែនដី ឱ្យកាន់តែខិតជិតមាត់ជ្រោះ​នៃភាពវិនាស។

លោក ឡាំប៊រទីនី បានមាននិយាយថា “បេសកកម្មរបស់យើងមានសារៈ​សំខាន់​កាន់​តែខ្លាំងឡើង ក្នុងរយៈពេលប្រាំមួយទសវត្សរ៍ចុងក្រោយនេះ។ បច្ចុប្បន្ន យើងបានយល់ និងដឹង​ថាមនុស្ស ជាតិទាំងមូលអាចមានអនាគតប្រកបដោយសុវត្ថិភាព វិបុលភាព គុណភាព​ និង​សមធម៌បាន លុះត្រាតែមនុស្សថែរក្សា និងការពារភពផែនដីហើយប្រកាន់ខ្ជាប់​ឱ្យបាននូវ​គោល​​​ការណ៍អភិវឌ្ឍន៍ ប្រកបដោយចីរភាពជាបទដ្ឋាន”។ លោកបានបន្តទៀតថា ទសវត្សរ៍នេះ​ជាចំណុចនៃរបត់សង្គម ដ៏សំខាន់ ហើយជំងឺឆ្លងផ្លូវដង្ហើមប្រភេទថ្មីកូវីដ១៩ គឺជាការពញ្ញាក់​ស្មារតី​ឱ្យយកចិត្តទុកដាក់ ចំពោះហានិភ័យផ្សេងៗដែលបង្កឡើងដោយទង្វើគ្មាន​តុល្យភាព​របស់មនុស្សដែលបង្កអន្តរាយដល់ ធម្មជាតិ។

ក្នុងរយៈពេល ៦០ ឆ្នាំ កន្លងទៅ អង្គការWWF​ បានដើរតួនាទីស្នូលដើម្បីគាំទ្រដល់​កិច្ច​ការសកលលោក ក្នុងវិស័យបរិស្ថាន ហើយបានផ្តួចផ្តើមនូវយន្តការ ផែនការនិងគំនិតប្រកប​ដោយភាពច្នៃប្រឌិត ថ្មីៗសម្រាប់ ផ្តល់ជាដំណោះស្រាយក្នុងវិស័យអភិរក្ស ដែលកំពុងត្រូវបាន​បន្ត​អនុវត្តន៍​មកដល់សព្វថ្ងៃនេះ គិតរាប់ចាប់ តាំងពីការគាំទ្រដល់ការបង្កើតតំបន់ការពារ​ធម្ម​ជាតិធំៗ ដូចជា៖ ឧទ្យានធម្មជាតិជាតិនៃហ្គាឡាប៉ាហ្គូស និងភ្នំភ្លើងនៅប្រទេសអេក្វាឌ័រ​និងរវ៉ាន់ដា រហូតដល់ការអភិរក្សប្រភេទសត្វ និមិត្តរូបសំខាន់ៗរួមមាន សត្វខ្លាឃ្មុំផេនដា ខ្លាធំ រមាស និងដំរី ដើម្បីផ្តល់ដល់សត្វទាំងនេះ និងប្រភេទសត្វព្រៃផ្សេងទៀត នូវការរស់រាន​តទៅ​អនាគត។

នៅក្នុងប្រទេសកម្ពុជា អង្គការ WWF បាន និងកំពុងអនុវត្តន៍កម្មវិធីអភិរក្សអាទិភាព​សំខាន់ៗអស់រយៈកាលជាងពីរទសវត្សរ៍មកហើយ ក្រោមកិច្ចសហប្រតិបត្តិការយ៉ាងជិតស្និទ្ធ​ជាមួយរាជរដ្ឋាភិបាលកម្ពុជា សហគមន៍មូលដ្ឋាន តួអង្គសំខាន់ៗក្នុងវិស័យអភិវឌ្ឍន៍​និងវិស័យ​ឯកជន និងដៃគូដទៃទៀត។ នៅកម្ពុជា អង្គការ WWF គឺជាស្ថាប័នដែលមាន​វ័យចំណាស់​ជាង​គេមួយដែលធ្វើការក្នុងវិស័យបរិស្ថាន និងការអភិរក្សជីវចម្រុះ ដែលបានរួមចំណែកយ៉ាង​សំខាន់ដល់ការរៀបចំតាក់តែងគោលនយោបាយបរិស្ថាន ហើយជាស្ថាប័នមិនមែនរដ្ឋាភិបាល​ដ៏សកម្មបំផុតមួយដែលមានសកម្មភាពការងាររបស់ខ្លួននៅថ្នាក់មូលដ្ឋាន ជាពិសេសបាន​ផ្តួច​ផ្តើម និងគាំទ្រដល់ការអនុវត្តវិធីសាស្រ្តអភិរក្សថ្នាក់តំបន់​ទេសភាពសម្រាប់ការគ្រប់គ្រង​តំបន់​ការពារ ការអភិរក្សធនធានជលផលទឹកសាប ការស្រាវ​ជ្រាវ និងតាមដានជីវចម្រុះ ការបង្កើត​ភាពជាដៃគូនឹងវិស័យឯកជន និងការអភិវឌ្ឍជីវភាព​សហគមន៍។

លោក សេង ទៀក នាយកអង្គការ WWF កម្ពុជាបានមានប្រសាសន៍ថា តំបន់ព្រៃ​ទេសភាពខ្ពង់រាបភាគខាងកើត និងតំបន់ទេសភាពមេគង្គ ក្នុងប្រទេសកម្ពុជា គ្របដណ្តប់លើ​តំបន់ការពារសំខាន់ៗមួយចំនួនដែលសុទ្ធសឹងមានសារៈសំខាន់ជាសកលដោយសារតែតម្លៃជីវចម្រុះឥតកាត់ថ្លៃបាន ហើយដែលតំបន់ទាំងនេះជាទីជម្រកនៃ​ប្រភេទសត្វ​ព្រៃរង​គ្រោះថ្នាក់​ជិតផុតពូជបំផុត ដូចជា សត្វដំរីអាស៊ី សត្វផ្សោតទន្លេមេគង្គ សត្វខ្លារខិន សត្វទន្សោង សត្វ​ក្រពើភ្នំ ព្រមទាំងពពួកសត្វស្លាបមាឌធំជាច្រើនប្រភេទទៀត។ លោក សេង ទៀក បានលើក​ឡើងថា “យើងត្រូវពង្រឹងបន្ថែមនូវទំនាក់ទំនង​ភាពជាដៃគូចម្រុះ និងបង្កើនចំណេះដឹងផ្នែក​វិទ្យាសាស្ត្រ ដែលយើងបានកសាងរួចហើយ​ក្នុងរយៈពេលជាងពីរទសវត្សរ៍កន្លងមកនេះ​នៅ​ក្នុងប្រទេសកម្ពុជា ហើយបន្តបង្កើនសមត្ថភាព​ផ្ទាល់ខ្លួនដើម្បីបន្តបំផុសភាពច្នៃប្រឌិត និងរួម​គ្នាស្វែងរកដំណោះស្រាយ ចំពោះបញ្ហា​ប្រឈម​ដ៏ស្មុគស្មាញដែលកំពុងកើតមាន តួយ៉ាង​ហា​និ​ភ័យនៃអាកាសធាតុ ភាពសឹករិចរិលនៃប្រព័ន្ធ​អេកូឡូស៊ី និងការបាត់បង់ជីវចម្រុះ។ នេះ​ជា​ពេល​វេលាដែលយើងទាំង អស់គ្នា​ត្រូវរួមគ្នាធ្វើ​សកម្មភាពដើម្បីធានាការផ្លាស់ប្តូរ​ជាវិជ្ជ​មាន”។

សូមរម្លឹងផងដែរថា អង្គការ WWF បានចាប់បដិសន្ធិឡើងក្នុងឆ្នាំ ១៩៦១ ក្រោម​គំនិត​ផ្តួចផ្តើមដោយ​បិតា​ស្ថាបនិកដែលសុទ្ធសឹងជាបុគ្គលមានឥទ្ធិពល និងឆន្ទៈក្នុងការការពារធម្ម​ជាតិ ដោយបាន​ សម្រាប់ជាក្តីរំពឹងថា មនុស្ស​និងធម្ម​ជាតិ​អាចរស់នៅ​ជាមួយគ្នាដោយសុខុដុម។ អង្គការ ​WWF​ក៏បានពង្រីកវិសាលភាពការងារ​របស់​ខ្លួន​បន្ថែមលើ​ការ​ការពារសត្វព្រៃ និងទីជម្រក ដោយបានបង្កើតវិធីសាស្ត្រអភិរក្សធម្ម​ជាតិ​ជាប្រព័ន្ធ និង​ផ្តោត​លើការអភិវឌ្ឍប្រកបដោយចីរភាព តាមរយៈការពង្រីកបណ្តាញ​កម្ម​វិធីអភិរក្សធនធាន​សត្វព្រៃ ព្រៃឈើ ធនធានទឹកសាប សមុទ្ទ និងតាមរយៈការស្វែងរកដោះ​ស្រាយ​ដល់ឬស​គល់​នៃកត្តាគំរាមកំហែងដែលបង្កការ បាត់បង់ធនធានធម្មជាតិ ក្នុងនោះ​រួមមាន​វិស័យថាមពល និងសង្វាក់ផលិតកម្មចំណីអាហារ ជម្រុញការផ្លាស់ ប្តូរនៃសង្វាក់ទីផ្សារ និងលើកកម្ពស់ហិរញ្ញ​វត្ថុបៃតង ក៏ដូចជាពង្រឹងអភិបាលកិច្ចធនធានធម្មជាតិ។

លោក ឡាំប៊រទីនី បានថ្លែងបញ្ជាក់ថា “សមិទ្ធផលការងារដែលយើងសម្រេច​បានកន្លង​មក គឺអាស្រ័យដោយ មាការចូលរួមធ្វើការងារជាមួយគ្នា ពីដៃគូ និងអ្នកគាំទ្រជាច្រើន​របស់​យើង ក្នុងចលនាការពារបរិស្ថាន។ យើងសូមថ្លែងអំណរគុណយ៉ាងជ្រាលជ្រៅដល់​ប្រជាជន​រាប់លាននាក់ ដែលបានផ្តល់សេចក្តីទុកចិត្ត និងគាំទ្របេសកកម្មរបស់យើង ហើយក៏សូមថ្លែង​អំណរផងដែរ ដល់បុគ្គលិករបស់យើងរាប់ពាន់នាក់នៅ ទូទាំងពិភពលោក ទាំងពីអតីតកាល​រហូត​ដល់បច្ចុប្បន្ន ដែលបម្រើការងារប្រកបដោយឆន្ទៈ និងការប្តេជ្ញាចិត្ត អស់រយៈពេល៦០​ឆ្នាំកន្លងមកនេះ” ។

នៅក្នុងខួបលើទី៦០នេះ  អង្គការ WWF បានវិវត្តន៍ខ្លួនទៅជាស្ថាប័នពហុវប្បធម៌​សកល​មួយ ដែលមានវត្តមាន និងប្រតិបត្តិការយ៉ាងសកម្មនៅក្នុងប្រមាណ ១០០ ប្រទេស ដោយមាន​អ្នក​គាំទ្រចំនួនជាង ៣៥ លាននាក់ នៅទូទាំងពិភពលោក ហើយបានសម្តែងឆន្ទៈ និង​សកម្មភាពរួមគ្នាដើម្បីកសាងសង្គមបរិស្ថានមួយប្រកប ដោយគុណភាពសមធម៌ និងនិរន្តរភាព សំដៅធានាការថែរក្សានិងការពារធនធានធម្មជាតិ និងសុខុមាលភាព របស់មនុស្សនៅគ្រប់​ទីសទី។

លោក ឡាំប៊រទីនី បានបន្ថែមទៀតថា “បេសកកម្មរបស់យើងគឺនៅវែងឆ្ងាយណាស់។ រយៈ​ពេល៦០ឆ្នាំកន្លង ទៅនេះ គេបានអង្កេតឃើញពិភពលោកមានការប្រែប្រួលយ៉ាងខ្លាំង ឯបេស​ក​កម្មរបស់អង្គការ WWF ក៏មានការវិវត្តខ្លាំងណាស់ដែរ។ អ្វីដែលមិនមានការផ្លាស់ប្តូរ​នោះ​គឺការប្តេជ្ញាចិត្តដែលឥតងាករេរបស់អង្គការ WWF ដើម្បីបន្តរួមចំណែកជាវិជ្ជមានដល់​ការ​កសាង​អនាគតមួយដែលមនុស្សនិងធម្មជាតិរីកចម្រើន ដោយសុខុដុម។ វិទ្យាសាស្រ្តបាន​បង្ហាញ​តម្លៃខ្លួនកាន់តែច្បាស់ឡើង រីឯព័ត៌មាននិងចំណេះដឹងក៏កាន់ តែប្រសើរឡើងដែរ។ សង្គមយើងទាំងមូលបានត្រៀមខ្លួនសម្រាប់ការផ្លាស់ប្តូរជាវិជ្ជមាន រួមគ្នា យើងអាចធ្វើបាន”៕

ដោយ រិទ្ធី ប្រភព៖ អង្គការ WWF