AKP ភ្នំពេញ ថ្ងៃទី២២ ខែមករា ឆ្នាំ២០២១--ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះពិនិត្យកសិដ្ឋានចិញ្ចឹមត្រីលម្អ First Aquatic Indutrial Co., Ltd នៅភូមិកោះផុស ឃុំដីឥដ្ឋ ស្រុកកៀនស្វាយ ខេត្តកណ្តាល នារសៀលថ្ងៃ៨កើត ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃព្រហស្បតិ៍ចទី២១ ខែមករា ឆ្នាំ២០២១។ 

Mr. Li Xuequn អ្នកគ្រប់គ្រងទូទៅនៅក្នុងកសិដ្ឋានបានជម្រាបជូនឯកឧត្តមរដ្ឋមន្ត្រីថា កសិដ្ឋានបានចាប់ផ្តើមដំណើរការនៅឆ្នាំ២០១៧ ដោយចំណាយទុនវិនិយោគចំនួន ៤លានដុល្លារអាម៉េរិក ដោយមិនរួមបញ្ចូលការវិនិយោគ លើការកសាងហេដ្ឋរចនាសម្ព័ន្ធសំខាន់ៗ។ បច្ចុប្បន្នមានចិញ្ចឹមត្រីលម្អ (ត្រីនាគ) នាំពូជចូលពីប្រទេសចិន ត្រីបបែលទឹកសាប និងត្រីទឹកសាបកម្ពុជាជាច្រើនប្រភេទទៀត ផងដែរ។ នៅឆ្នាំដំបូងនេះកសិដ្ឋានគ្រោងនាំចេញត្រីនាគជាង ១.០០០ក្បាល/ឆ្នាំ និងត្រីបបែលជាង ៥.០០០ក្បាល/ឆ្នាំ ទៅកាន់ទីផ្សារប្រទេសចិន ដោយគិតក្នុងតម្លៃត្រីនាគពេញវ័យលក់បាន ១.០០០ដុល្លារអាម៉េរិក/ក្បាល និងត្រីបបែល ២០០ដុល្លារអាម៉េរិក/ក្បាល (តម្លៃអាស្រ័យលើប្រភេទពូជ ពណ៌ ទំហំ និងអាយុ)។ កសិដ្ឋានប្រើកម្មករសរុប ៥០នាក់ ក្នុងនោះមានអ្នកជំនាញជលផលទាំងខ្មែរ និងចិនចំនួន ១០នាក់។

បន្ទាប់ពីបានអញ្ជើញពិនិត្យសកម្មភាពខ្សែច្រវាក់ផលិតកម្មក្នុងកសិដ្ឋាន និងបានជ្រាបអំពីដំណើរការនៃការវិនិយោគ និងកម្មវត្ថុនាំចេញរបស់ក្រុមហ៊ុនរួចមក ឯកឧត្តមរដ្ឋមន្ត្រីបានវាយតម្លៃខ្ពស់ ចំពោះក្រុមហ៊ុនដែលបានដាក់ទុនវិនិយោគបង្កើតកសិដ្ឋានចិញ្ចឹមត្រីលម្អ ដែលសកម្មភាពនេះ សមស្របតាមគោលនយោបាយរបស់រាជរដ្ឋាភិបាលក្នុងការគាំទ្រ និងលើកទឹកចិត្តដល់វិនិយោគិនក្នុងនិងក្រៅប្រទេស សំដៅលើកស្ទួយវិស័យវារីវប្បកម្ម និងការនាំចេញត្រីលម្អ ក្នុងការចូលរួមទ្រទ្រង់ខឿនសេដ្ឋកិច្ចជាតិ។

ព្រមជាមួយសមិទ្ធផលដែលក្រុមហ៊ុនសម្រេចបាននាពេលបច្ចុប្បន្ន ឯកឧត្តមរដ្ឋមន្ត្រីក៏បានណែនាំឱ្យក្រុមហ៊ុន ត្រៀមរៀបចំឯកសារបច្ចេកទេសពាក់ព័ន្ធដល់ការចិញ្ចឹម សម្រាប់ឈានទៅដល់ការរៀបចំពិធីសារនាំចេញត្រីលម្អទៅកាន់ប្រទេសចិន ដោយត្រូវសហការជា មួយរដ្ឋបាលជលផលកម្ពុជា ធ្វើការទំនាក់ទំនងជាមួយអគ្គរដ្ឋបាលគយចិន ស្នើសុំបែបបទ ឬលក្ខខណ្ឌតម្រូវចាំបាច់នានាពីភាគីចិន ជាជំហានបឋម ដើម្បីឱ្យដំណើរការនាំចេញនាពេលខាងមុខប្រព្រឹត្តទៅដោយរលូន ចៀសវាងការកកស្ទះផលិតផលដែលកសិដ្ឋានចិញ្ចឹមបាន។

បន្ទាប់មកឯកឧត្តមរដ្ឋមន្ត្រី ក៏បានចុះពិនិត្យដំណើរការនេះ ព្រមទាំងបានលើកទឹកចិត្តក្រុមហ៊ុន ដោយបញ្ជាក់ថា ក្រសួងក៏ដូចជារដ្ឋបាលជលផលនឹងរង់ចាំសហការសម្របសម្រួល ដើម្បីឱ្យដំណើរការវិនិយោគចិញ្ចឹមត្រីលម្អ និងដំណើរការនាំចេញត្រីលម្អនេះសម្រេចទទួលបានជោគជ័យ៕

ដោយ សេង សុវណ្ណនី(ប្រភពក្រសួងកសិកម្ម)