AKP សៀមរាប ថ្ងៃទី៣០ ខែវិច្ឆិកា ឆ្នាំ២០២០  -- ឯកឧត្ដម ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រី​ក្រសួងសាធារណការ និងដឹកជញ្ជូនបាន​ស្នើ​ឱ្យអង្គភាពទទួលការងារអនុវត្តន៍​គម្រោងទាំង៣៨ខ្សែនៅក្រុងសៀមរាប ត្រូវប្រកាន់គោល​ជំហរ​ និងការប្តេជ្ញាចិត្តខ្ពស់ ប្រកបដោយស្មារតីទទួល​ខុសត្រូវលើការងារស្ថាបនា​ហេដ្ឋា​រចនា​សម្ព័ន្ធផ្លូវទាំង៣៨ខ្សែ និងការងាររៀបចំសាងសង់​ប្រព័ន្ធបង្ហូរទឹកភ្លៀង និងទឹកកខ្វក់​ដែល​នៅ​ក្រៅគម្រោងសាងសង់ខ្សែផ្លូវទាំង៣៨នេះ ដោយ​គោរពតាមបទដ្ឋានលក្ខណៈ​បច្ចេក​ទេស និង​សៀវភៅបន្ទុកឱ្យបានត្រឹមត្រូវ ពិសេសត្រូវ​មានកម្មករ គ្រឿងចក្រ និងឧបករណ៍​សាង​សង់​ឱ្យបានគ្រប់គ្រាន់ ដើម្បីសម្រេចការងារនេះ​ឱ្យបានឆាប់រហ័សតាមការគ្រោងទុក។

ក្នុងពិធីបើកការដ្ឋានស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ ក្នុងក្រុងសៀមរាប ខេត្ដ​សៀមរាបនាព្រឹកថ្ងៃទី៣០ ខែវិច្ឆិកា ឆ្នាំ២០២០ ឯកឧត្ដមទេសរដ្ឋមន្រ្ដី ស៊ុន ចាន់ថុល បាន​មាន​ប្រសាសន៍ថា ផ្លូវទាំង៣៨ខ្សែនេះ មានប្រវែង​១០៨,៧៤ គីឡូម៉ែត្រ គ្រោងប្រើប្រាស់ថវិកាជាតិ​សរុបប្រមាណ១៤០លានដុល្លារអាមេរិក (១៤០ ១៤៦ ៣០៥ ដុល្លារអាម៉េរិក) និងថវិកា​ប្រមាណ​ជាង ៩លាន ដុល្លារអាម៉េរិកទៀត (៩ ០៧០ ២៩០ ដុល្លារអាម៉េរិក) សម្រាប់ការងារចាំ​បាច់ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ដែលនៅ ក្រៅគម្រោងសាងសង់​ខ្សែផ្លូវទាំង៣៨នេះ។ ឯកឧត្ដមទេសរដ្ឋមន្រ្ដីបាន​បញ្ជាក់ថា គម្រោងនេះនឹងប្រើប្រាស់​រយៈ​ពេល ១៣ខែ ដែលគ្រោងនឹង បញ្ចប់ការសាងសង់​នៅចុងឆ្នាំ២០២១ ខាងមុខនេះ។ ឯកឧត្តម​ទេស​រដ្ឋមន្ត្រីបានបន្តថា ដើម្បីធានាគុណភាពនៃ​ការសាង​សង់ផ្លូវទាំង៣៨ ខ្សែនេះឱ្យស្របនឹង​បទដ្ឋាន និងលក្ខណៈបច្ចេកទេសតាម​ប្រភេទ​ខ្សែផ្លូវនីមួយៗ គណៈកម្មការអន្តរក្រសួង បាន​សម្រេចបង្កើតក្រុមការងារត្រួតពិនិត្យ និងវាយ​តម្លៃ​កា​រងារ​របស់អ្នកទទួលការ និងមានក្រុម​ការងារត្រួតពិនិត្យបច្ចេកទេសអន្តរក្រសួង​ចំនួន​៩ទៀត ជាសេនាធិការដែលមានភារកិច្ចប្រចាំ​ការនៅតាមការដ្ឋាននីមួយៗ ផងដែរ។

ឯកឧត្តមទេសរដ្ឋមន្ត្រីបានបន្ថែមថា បើទោះបីកម្ពុជាបាននិងកំពុងជួបប្រទះបញ្ហាធំៗ ដូចជា បញ្ហាការរីករាលដាលជំងឺកូវីដ-១៩ ការកាត់ផ្តាច់ផ្នែកខ្លះនៃការអនុគ្រោះពន្ធ EBA បញ្ហាគ្រោះ មហន្តរាយធម្មជាតិ ទឹកជំនន់ ក៏ពិតមែន ប៉ុន្តែកម្ពុជានៅតែអាចឈរក្នុងភាព​ជា​ម្ចាស់​ការដោយ​ខ្លួនឯង បាន និងបានកសាងនូវសមិទ្ធផលជាច្រើនពាសពេញផ្ទៃប្រទេស និង​មានការអភិវឌ្ឍរីកចម្រើនលើគ្រប់វិស័យ។ ទន្ទឹមនេះ ហេដ្ឋារចនាសម្ព័ន្ធផ្លូវចំនួន​៣៨ខ្សែ​នេះ គឺជាសមិទ្ធផលថ្មីបន្ថែមទៀត បន្ទាប់ពីហេដ្ឋារចនាសម្ព័ន្ធផ្លូវនៅក្នុង​ខេត្តព្រះសីហនុ ដែល​បាន​និងកំពុងស្ថាបនាសាងសង់ឡើង ត្រៀមនឹងបញ្ចប់ការសាងសង់នាពេលដ៏ខ្លីខាងមុខ។

ឯកឧត្តមទេសរដ្ឋមន្ត្រីបានថ្លែងអំណរគុណយ៉ាងជ្រាលជ្រៅដល់ក្រសួង-ស្ថាប័នពាក់​ព័ន្ធ អាជ្ញាធរដែនដី និងបងប្អូនប្រជាពលរដ្ឋដែលមានដីធ្លី ភូមិឋាន និងផ្ទះសម្បែងស្ថិត​នៅជិត​ការដ្ឋានសាងសង់ ដែលបានផ្តល់កិច្ចសហការយ៉ាងល្អប្រសើរលើការងារដោះស្រាយ​ផល​ប៉ះ​ពាល់ ជំរុញឱ្យការបើកការដ្ឋានសាងសង់ អាចដំណើរការទៅបានដោយរលូន។

សូមបញ្ជាក់ផងដែរថា ទីក្រុងសៀមរាប បាននិងកំពុងប្រែក្លាយរូបរាងជាទីក្រុងទំនើប និងទេសចរណ៍ ដ៏មានសក្តានុពល ហើយត្រូវបានរាជរដ្ឋាភិបាលកម្ពុជាកំណត់ជាតំបន់ស្នូល​នៃប៉ូលអភិវឌ្ឍន៍ជាតិ ជាគោលដៅទេសចរណ៍វប្បធម៌ ប្រវត្តិសាស្រ្ត និងធម្មជាតិ ដែលមាន​សក្តានុពលសេដ្ឋកិច្ច សម្បូរបែប និងអាចទាក់ទាញទេសចរណ៍ជាតិ និងអន្តរជាតិរាប់​លាន​នាក់ ចូលមកទស្សនា ក្នុងមួយឆ្នាំៗ លើកលែងតែក្នុងអំឡុងពេលនៃការរីករាលនៃវីរុសកូវីដ-១៩ ជាសកលទូទាំងពិភពលោកនាពេលបច្ចុប្បន្នតែប៉ុណ្ណោះ។ គម្រោងនេះ​ ដើរតួនាទីជា​ហេដ្ឋា​រចនាសម្ព័ន្ធប្រទាក់ក្រឡាគ្នា តភ្ជាប់ទីប្រជុំជន ទៅជាយក្រុង និងតភ្ជាប់ទៅ កាន់តំបន់​ទេស​ចរណ៍សំខាន់ៗ និងបណ្តាញខ្សែផ្លូវជាតិនានា សំដៅកាត់បន្ថយការកកស្ទះចរាចរណ៍ក្នុង ទីក្រុង ជំរុញកំណើនដឹកជញ្ជូន ទាក់ទាញវិនិយោគិន ធុរជន និងភ្ញៀវទេសចរជាតិ-អន្តរជាតិ រួមចំណែកដល់ការជំរុញកំណើនសេដ្ឋកិច្ចជាតិនៅក្រោយវិបត្តិនៃជំងឺកូវីដ-១៩៕

ដោយ រិទ្ធី ប្រភព៖ ក្រសួងសាធារណការ