AKP កំពង់ធំ ថ្ងៃទី២៥ ខែធ្នូ ឆ្នាំ២០១៨ -- ប្រជាពលរដ្ឋដែលជាមាតា បិតាសិស្ស លោកគ្រូ អ្នកគ្រូ បានសំណូមពរដល់ ឯកឧត្តម បណ្ឌិត ងួន ញ៉ិល តំណា​ងរាស្រ្តមណ្ឌលខេត្តកំពង់ធំ និងជាអនុប្រធានទី១នៃរដ្ឋសភា ជួយផ្តួច ផ្តើមប្រមូលថវិកា ដើម្បីកសាងអគារសិក្សាបន្ថែមក្នុងវិទ្យា​ល័យ ហ៊ុន សែន ក្រវ៉ា ស្ថិតនៅក្នុងឃុំក្រវ៉ា ស្រុកបារាយ​ណ៍ ខេត្តកំពង់ធំ ដើម្បីឆ្លើយតបនឹងកំណើន សិស្សានុ សិស្សដែលចេះតែកើនឡើងពីមួយឆ្នាំទៅមួយឆ្នាំ។

ឆ្លើយតបសំណើនេះឯកឧត្តមបណ្ឌិត ងួន ញ៉ិល បានរៀប​ចំពិធីបុណ្យផ្កាសាមគ្គី មួយឡើងនាថ្ងៃទី២៤ និងថ្ងៃទី២៥ ខែធ្នូ ឆ្នាំ២០១៨ ដើម្បីប្រមូលបច្ច័យសម្រាប់កសាង អគារសិក្សាតាមសំណើរបស់ប្រជាពលរដ្ឋនេះ។ បុណ្យផ្កាសាមគ្គីដែលរៀបចំធ្វើឡើងនៅ ខេត្តកំពង់​ធំនោះ មានការចូលរួមពីប្រជា ពុទ្ធបរិស័ទ សមាជិកសមាជិការដ្ឋសភា ព្រឹទ្ធសភា និងរាជរដ្ឋាភិបាល អាជ្ញាធរខេត្តផងដែរ។​  

នៅក្នុង​ពិធី​បើក​ការដ្ឋាន​សាងសង់អគារ​សិក្សា១ខ្នង ៦បន្ទប់​  នាព្រឹក​ថ្ងៃ​ទី​២៥ ខែ​ធ្នូ ​ឆ្នាំ​២០១៨នេះ ឯកឧត្ដមបណ្ឌិត ​ងួន ញ៉ិល​ អនុប្រធាន​ទី​១រដ្ឋសភា បានលើក​ឡើង​ថា ​គោលដៅ​សំខាន់របស់រាជរដ្ឋាភិបាល គឺការពង្រឹងមូលដ្ឋានអប់​រំ​ក្នុងសហគមន៍ ដើម្បីឱ្យមានការចូលរួម យ៉ាងសកម្មក្នុងកិច្ច​ការសង្គម សេដ្ឋកិច្ច ឈរលើមូលដ្ឋានចំណេះដឹង សមត្ថភាព និងជំនាញ​។  

ឯកឧត្តមបណ្ឌិតបានបន្តថា សាលារៀន គឺជាផ្នែកមួយដ៏សំខាន់នៅក្នុងសហគមន៍ ហើយបើសហគមន៍មានអ្នកចេះដឹងច្រើន គឺជាមូលដ្ឋានគ្រឹះដ៏រឹងមាំ សម្រាប់ការអភិវឌ្ឍន៍ សហគមន៍។ ឯកឧត្តមបណ្ឌិតបានបន្ថែមទៀតថា មានសាលារៀនល្អ គឺអាចឱ្យយើងដោះ ស្រាយបានមួយចំណែកនូវភាពគ្រោះថ្នាក់នៃអវិជ្ជា។ មានសាលារៀនល្អ មាតាបិតាទាំងឡាយ នឹងមានការលើកទឹកចិត្ត ក្នុងការបញ្ជួនបុត្រធីតារបស់ខ្លួនឱ្យចូលរៀនបានគ្រប់ៗគ្នា។

ឯកឧត្តមបណ្ឌិត បានគូសបញ្ជាក់ថា ក្នុងយុគសម័យអភិវឌ្ឍន៍ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន បានដាក់ចេញនូវគោលការណ៍ដោយបង្ខិត សាលារៀនឱ្យមកនៅជិតសហគមន៍តាមមូលដ្ឋាន ដើម្បីកាត់បន្ថយនូវអនក្ខរៈជន គឺភាពមិនចេះអក្សរដល់ពលរដ្ឋទូទាំងប្រទេសក្នុងគោលដៅកាត់បន្ថយភាពក្រីក្រដល់ប្រជាជនកម្ពុជាទាំងមូល។

ឯកឧត្តមបណ្ឌិតបានបន្ថែមទៀតថា ប្រទេសកម្ពុជាជារដ្ឋអធិបតេយ្យ និងសន្តិភាព មិនចំណុះឱ្យរដ្ឋណាមួយឡើយ កត្តាទាំងនេះហើយនាំឱ្យប្រទេសកម្ពុជាមានការអភិវឌ្ឍយ៉ាង ច្បាស់លាស់ និងយ៉ាងឆាប់រហ័ស ទន្ទឹមនឹងនេះយើងត្រូវការទុនមនុស្សប្រកដោយផ្លែផ្កា និងគុណភាពជាការចាំបាច់។ ក្នុងតំណាក់កាលសន្តិភាពយើងត្រូវការអភិវឌ្ឍកត្តាចំនួន៤ ៖ ទុនមនុស្សប្រកបដោយចំណេះដឹង ទឹក ផ្លូវ ភ្លើង។ ឯកឧត្តមបណ្ឌិត បានលើកឡើងទៀតថា រាជរដ្ឋាភិបាលកម្ពុជាបានដាក់ចេញ នូវគោលនយោបាយពង្រឹងនូវសមត្ថភាពគ្រូបង្រៀន ការផ្តល់នូវហេដ្ឋារចនាសម្ព័ន្ធ​ ការបង្កើតតបណ្ណាល័យ ការផ្តល់សៀវភៅសិក្សា ដោយឥតគិតថ្លៃ ការកែលម្អកម្មវិធីសិក្សាជាដើម។ ជាពិសេសការបង្កើនប្រាក់ខែ និងប្រាក់ បំណាច់របស់គ្រូបង្រៀនជាបណ្តើរៗទៅតាមលទ្ធភាពនៃកំណើនថវិកាជាតិ និងការបំពាក់ សម្ភារចាំបាច់នានាដល់សាលារៀន ដើម្បីធានាផ្តល់ជូនដល់គ្រូបង្រៀន និងសាលារៀននូវ មធ្យោបាយ និងសម្ភារគ្រប់គ្រាន់សម្រាប់ដំណើរការ។ លើសពីនេះទៅទៀតសម្រាប់ការ កាត់បន្ថយចំណាយដោយផ្ទាល់ និងដោយប្រយោលរបស់មាតាបិតាសិស្ស ទៅលើការសិក្សារបស់បុត្រធីតា ដែលជាឧបសគ្គយ៉ាងធំដែលរារាំងមិនឱ្យសិស្ស ក្រីក្ររៀនបានខ្ពស់។

ឯកឧត្តមបណ្ឌិត ងួន ញ៉ិល បានថ្លែងអំណរគុណយ៉ាងជ្រាលជ្រៅដល់ប្រជាពុទ្ធបរិស័ទ និងសប្បុរសជនទំាងឡាយ ដែលចូលរួមថវិកាក្នុងការកសាងអគារសិក្សា ដែលជាថ្នាល បណ្តុះបណ្តាលធនធានមនុស្ស ហើយនេះជាកម្លំាងសាមគ្គីដ៏រឹងមាំ បង្ហាញពីវប្បធម៌ចែករំ លែកនៅក្នុងសង្គមខ្មែរ៕

ដោយ ប៉ាល់ សុង