AKP ភ្នំពេញ ថ្ងៃទី២៥ ខែធ្នូ ឆ្នាំ២០១៨ -- ក្រុមក្រសួងព័ត៌មានរកបាន៣ពិន្ទុនៅប្រកួតដំបូងរបស់ខ្លួន បន្ទាប់ពីបានយកឈ្នះលើក្រុមអគ្គ លេខាធិការដ្ឋានព្រឹទ្ធសភា ដោយលទ្ធផល ៤ទល់០ នៅក្នុងការប្រកួតវគ្គ សន្សំពិន្ទុ ក្នុងពូល A នៃព្រឹត្តិការណ៍ កីឡាបាល់ទាត់ដណ្តើមពានរង្វាន់មិត្តភាពយុវជនអន្តរក្រសួង ស្ថាប័ន លើក ទី៦ រដូវកាល២០១៨ ថ្មីៗនេះ នៅទីលាន Premium Sport Club រាជធានីភ្នំពេញ។

៤គ្រាប់ជ័យជម្នះរបស់ក្រសួងព័ត៌មានធ្វើសម្រេចដោយកីឡាករ ទឹម សារពេជ្រ នៅ​នាទី២៨, ធ្វើសម្រេចបាន២គ្រាប់ដោយកីឡាករ សំ វិបុល នៅនាទី៤១ និងនាទី៦០ និង​រកបានដោយកីឡាករ កៅ សាមឿន នៅនាទី៦៩ ខណៈយុវជនអគ្គលេខាធិការដ្ឋានព្រឹទ្ធ​សភា​បានព្យាយាមវាយបកមកវិញ ប៉ុន្តែមិនមានឱកាសរកគ្រាប់បាល់បានឡើយ។

លោក អន ឃួនសំអូន ប្រធានក្រុមបាល់ទាត់ក្រសួងព័ត៌មាននិយាយ​ក្រោយបញ្ចប់​ការប្រកួតថា សម្រាប់ការត្រៀមខ្លួនក្នុងការហ្វឹកហាត់ត្រៀមចំនួន៣ខែមកហើយ ដើម្បីធ្វើ​យ៉ាង​ណាឱ្យការប្រកួតដណ្តើមបាន នូវលទ្ធផលល្អជូនស្ថាប័នរបស់ខ្លួនពីព្រោះថា ​៥ឆ្នាំកន្លង មក​ក្រុមរបស់លោកមិនសូវទទួលបានលទ្ធផលល្អឡើយ ដោយភាគច្រើនប្រកួតចាញ់នៅ ក្នុងវគ្គសន្សំពិន្ទុ។ ប៉ុន្តែនៅថ្ងៃបើកឆាកការប្រកួតដំបូងរបស់ខ្លួនយុវជនក្រសួងព័ត៌ មានបាន យកឈ្នះ ដែលជាកម្លាំងចិត្តសម្រាប់ការប្រកួតបន្តបន្ទាប់ទៀត។ ប្រធានក្រុមរូបនេះបាន អះអាងថា ឆ្នាំនេះក្រុមរបស់លោកបានប្តេជ្ញាចិត្តរួមគ្នាថា ធ្វើយ៉ាងណាសម្រួចគោល ដៅរបស់ ខ្លួនឱ្យ​ឆ្លងផុតពូល។ លោកបានសម្តែងការដឹងគុណចំពោះឯកឧត្តម ខៀវ កាញារីទ្ធ រដ្ឋ​មន្ត្រី ក្រសួងព័ត៌មាន ដែលតែងតែបានលើកទឹកចិត្ត ឧបត្ថម្ភគាំទ្រដល់កីឡាករ​របស់ក្រសួងព័ត៌មាន ដែលបានចូលរួមសកម្មភាពកីឡានៃពានរង្វាន់មិត្តភាពយុវជនអន្តរ ក្រសួង​ស្ថាប័នចំនួន៦ឆ្នាំ​ជាប់ៗគ្នា។

ចំណែកឯតំណាងក្រុមអគ្គលេខធិការដ្ឋានព្រឹទ្ធសភា បានបង្ហាញនូវការសោកស្តាយ ដែលក្រុមរបស់លោកធ្វើមិនសូវបានល្អ នៅប្រកួតដំបូងជាមួយក្រុមក្រសួងព័ត៌មាន ដែល​រហូតគ្រាប់បាល់រហូតដល់ ៤គ្រាប់។ ក្រុមរបស់លោកធ្លាប់ជួបគ្នា២ដងរួចមកហើយ ប៉ុន្តែ​លើកនេះគូប្រកួតរបស់លោកធ្វើបានល្អ។ ទោះយ៉ាងនេះក្តី តំណាងក្រុមរូបនេះ​បានបង្ហាញឱ្យ​ឃើញនូវការប្តេជ្ញាចិត្តខ្ពស់ក្នុងការខិតខំបន្ថែមទៀត ដើម្បីទទួលបាននូវលទ្ធ ផលដ៏គាប់​ប្រសើរ សម្រាប់ការប្រកួតជាបន្តបន្ទាប់ទៀត ជាពិសេសគឺការចូលរួមក្នុងស្មារតីលេងកីឡា ដើម្បីសុខភាព មិត្តភាព សាមគ្គីភាព និងកិច្ចសហប្រតិបត្តិការរវាងកីឡាករ និងកីឡាឱ្យ​កាន់ តែល្អប្រសើរ តាមគោលការណ៍ និងស្មារតីនៃការរៀបចំរបស់សហភាពសហព័ន្ធយុវជន កម្ពុជា៕

ដោយ ហេង ណាលីន