AKP កំពង់ស្ពឺ ថ្ងៃទី០៣ ខែកក្កដា ឆ្នាំ២០២៣ -- មជ្ឈមណ្ឌលជាតិរក្សាសន្តិភាពបើកវគ្គបណ្តុះបណ្តាលភាសាបារាំងរយៈពេល២ឆ្នាំដល់សិក្ខា​កាមមួកខៀវកម្ពុជាចំនួន២៥នាក់ ដោយមានការសហការ និងផ្ដល់ថវិកា និងបច្ចេក​ទេស​ពី​អង្គការ និយាយភាសាបារាំង។ ឯកឧត្តម Jacques Pellet (ហ្សេក ប៉េឡេត) ឯកអគ្គ​រដ្ឋ​ទូតសាធារណរដ្ឋ​បារាំង​ប្រចាំ​ព្រះរាជាណាចក្រកម្ពុជាបានគូសបញ្ជាក់ថា ការ​បង្រៀន​ភាសា​បារាំង ក្នុងវិស័យយោធា មានសារៈសំខាន់ណាស់ ក្នុងការរៀបចំ​បេសកកម្ម​រក្សា​សន្តិ​ភាព។ ការគូសបញ្ជាក់របស់ឯកឧត្ដមឯកអគ្គរដ្ឋទូតបារាំងនេះ ក្នុងពិធីបើក​វគ្គ​បណ្តុះ​បណ្តាលភាសាបារាំង ដល់សិក្ខាកាមនៃកងយោធពលខេមរភូមិន្ទ នាព្រឹកថ្ងៃទី៣ ខែកក្តដា ឆ្នាំ២០២៣ នៅវិទ្យាស្ថានហ្វឹកហ្វឺនកងកម្លាំងរក្សាសន្តិភាព នាស្រុកឧដុង្គ ខេត្តកំពង់ស្ពឺ។

 ឯកឧត្ដម Jacques Pellet បានលើកឡើងថា ការបណ្តុះបណ្តាលភាសាបារាំង ក្នុង​វិស័យយោធានេះ បានឆ្លើយតប​ទៅ​នឹងការអំពាវនាវរបស់អង្គការសហប្រជាជាតិ ដើម្បី​ធានា​ថា ការចូលរួមរបស់កងកម្លាំង​មួក​ខៀវជាស្ត្រី នៅក្នុងប្រតិបត្តិការរក្សាសន្តិភាព។

ឯកឧត្តម ឧត្តមសេនីយ៍ឯក ប៉ោង មុន្នី អគ្គនាយករងមជ្ឈមណ្ឌលជាតិរក្សាសន្តិភាព បានឱ្យដឹងថា វគ្គសិក្សាភាសាបារាំង មានរយៈពេល២ឆ្នាំនេះ នឹងធ្វើតេស្តវាស់ស្ទង់​សមត្ថ​ភាពរយៈពេល៦ខែម្តង។ ឯកឧត្តម ឧត្តមសេនីយ៍ឯកបានបន្ដថា  ការបើកវគ្គសិក្សាភាសា​បារាំងនាពេលនេះជាផ្នែកមួយនៃផែនការ ជាយុទ្ធសាស្ត្ររបស់មជ្ឈមណ្ឌលជាតិ​រក្សាសន្តិ​ភាព ក្នុងការលើកកម្ពស់សមត្ថភាពទ័ពមួកខៀវកម្ពុជា សម្រាប់ប្រសិទ្ធភាពបេសកកម្ម​ក្រោម​​ឆ័ត្រអង្គការសហប្រជាជាតិ។

ឯកឧត្តម ឧត្តមសេនីយ៍ឯកបានបន្ថែមថា វគ្គសិក្សានេះ ពិតជាឆ្លុះ​បញ្ចាំង​ពីការ​ប្តេជ្ញា​ចិត្តរបស់ប្រទេសកម្ពុជា និងប្រទេសជាមិត្ត ពិសេសសាធារណរដ្ឋបារាំង ចំពោះ​ការ​គាំទ្រ​មិនដាក់ដៃ ដល់ការវិវឌ្ឍឱ្យកាន់តែប្រសើរឡើង ក្នុងប្រតិបត្តិការរក្សាសន្តិភាព។

ឯកឧត្តម អ៊ុច បូរិទ្ធ រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំ​ក្រសួងការបរទេសនិងសហប្រតិបត្តិការអន្តរជាតិ តំណាងដ៏ខ្ពង់ខ្ពស់ ឯកឧត្តម ឧបនាយក​រដ្ឋ​មន្ត្រី​ ប្រាក់ សុខុន រដ្ឋមន្ត្រីក្រសួងបរទេសនិងសហប្រតិបត្តិការអន្តរជាតិបានមាន​ប្រសាសន៍​ថា វគ្គបណ្តុះបណ្តាលភាសាបារាំង សម្រាប់បេសកកម្មរក្សាសន្តិភាពនៃអង្គការ​សហប្រជាជាតិ ក្រោមការឧបត្ថម្ភគាំទ្រទាំងថវិកា និងបច្ចេកទេសពីអង្គការ និយាយភាសា​បារាំង។ ឯកឧត្ដមបានបញ្ជាក់ថា វគ្គនេះគឺមានសិក្ខាកាមទ័ពមួកខៀវកម្ពុជាចំនួន២៥នាក់ ដែលមានរយៈពេល២ឆ្នាំ ដើម្បីធ្វើយ៉ាងណាឱ្យទ័ពមួកខៀវកម្ពុជា មានចំណេះ​កម្រិតអន្តរ​ជាតិក្នុងការប្រើប្រាស់​ភាសា​បារាំង នៅតំបន់បេសកកម្មប្រកបដោយប្រសិទ្ធភាពខ្ពស់។

ឯកឧត្ដមរដ្ឋមន្ត្រីប្រតិភូអមនាយករដ្ឋមន្ត្រីបានបញ្ជាក់ទៀតថា វគ្គបណ្តុះ​បណ្តាល​នេះ គឺជាឱកាសដ៏ល្អប្រសើរបំផុតសម្រាប់សិក្ខាកាមទាំងអស់ ក្នុងការ​បង្កើនចំណេះ ​និង​ជំនាញផ្នែកភាសាបារាំង ដើម្បីអភិវឌ្ឍន៍សមត្ថភាពរបស់ខ្លួន ឆ្លើយតប​ទៅនឹងសកម្មភាព​រក្សា​សន្តិភាពបូក ដែលក្នុងនោះ ផ្តោតសំខាន់លើការពង្រឹងកិច្ចសហការ និងការបង្កើន​សមត្ថភាពកងកម្លាំងរក្សាសន្តិភាពក្នុងគ្រប់តំបន់បេសកកម្ម៕

ដោយ៖ រិទ្ធី, ប្រភព៖ មជ្ឈ​មណ្ឌល​ជាតិរក្សាសន្តិភាព