AKP ភ្នំពេញ ថ្ងៃទី០៨ ខែមិថុនា ឆ្នាំ២០២៣ -- ជាមួយនឹងការសម្ដែងនូវសេចក្ដីរីករាយចំពោះកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងអេមីរ៉ាតអារ៉ាប់រួម ដែលបានចុះហត្ថលេខានោះ ប្រមុខរាជ​រដ្ឋាភិបាល​កម្ពុជា សម្ដេចអគ្គមហាសេនាបតីតេជោ ហ៊ុន សែន មានប្រសាសន៍ថា  កិច្ចព្រមព្រៀងនេះ នឹង​នាំ​មកនូវផលប្រយោជន៍សម្រាប់ប្រទេសទាំងពីរ។

ឯកឧត្ដម អ៊ាង សុផល្លែត ជំនួយការផ្ទាល់សម្ដេចតេជោបានឱ្យដឹងដូច្នេះ បន្ទាប់ពី​សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាន​អនុញ្ញាតឱ្យឯកឧត្តមបណ្ឌិត ថានី ប៊ីន អាម៉េត អាល់ ហ្សេយូឌី (Thani bin Ahmed Al Zeyoudi) រដ្ឋមន្រ្តីពាណិជ្ជកម្មអន្តរជាតិ នៃប្រទេសអេមីរ៉ាតអារ៉ាប់រួម និងគណៈប្រតិភូ ចូល​ជួប​សម្ដែងការគួរសម និងពិភាក្សាការងារ នារសៀលថ្ងៃទី០៨ ខែមិថុនា ឆ្នាំ២០២៣ នៅវិមាន​សន្តិភាព។

ក្នុងជំនួបនោះ  ឯកឧត្ដម Thani បានគោរពជម្រាបជូនសម្ដេចតេជោ អំពីជំនួបប្រកប​ដោយផ្លែផ្កា ជាមួយឯកឧត្ដមឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិ​បត្តិ​ការអន្តរជាតិ   ជាមួយឯកឧត្ដមរដ្ឋមន្ត្រីក្រសួងពាណិជ្ជកម្ម ជាមួយឯកឧត្ដមរដ្ឋ​មន្ត្រីក្រសួង​បរិស្ថាន និងជាមួយឯកឧត្ដមរដ្ឋមន្ត្រីក្រសួងទេសចរណ៍។ ឯកឧត្ដម Thani បានសម្ដែង​នូវ​ការ​រីករាយជាមួយកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ដែលកិច្ចព្រមព្រៀង​នេះ នឹងនាំសេដ្ឋកិច្ច និងប្រជាជនប្រទេសទាំងពីរ កាន់តែជិតគ្នាថែមទៀត ហើយរួមគ្នាជំរុញ​កិច្ច​សហប្រតិបត្តិការទ្វេភាគី លើសក្ដានុពលដែលកំពុងតែមាន។

ជាការឆ្លើយតប សម្ដេចតេជោនាយករដ្ឋមន្ត្រីបានសម្ដែងនូវសេចក្ដីរីករាយ ជាមួយ​កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ហើយបានមានប្រសាសន៍ថា កិច្ចព្រម​ព្រៀងនេះ នឹងនាំមកនូវផលប្រយោជន៍សម្រាប់ប្រទេសទាំងពីរ។ សម្ដេចតេជោបានលើកទឹក​ចិត្តឱ្យ​មានការពិចារណា លើការវិនិយោគលើវិស័យកសិកម្ម ដែលក្នុងនោះមាន ទី១. វិស័យ​ស្រូវអង្ករ ដែលកម្ពុជាមានស្រូវប្រមាណ ៦លានតោនដែលអាចនាំចេញ ក្នុងន័យនេះ សម្ដេច​តេជោ បានស្នើឱ្យមានការពិចារណាបង្កើតម៉ាស៊ីនកិនស្រូវ ឃ្លាំង និងបណ្ដាញទិញ សម្រាប់​ទិញកែច្នៃស្រូវសម្រាប់ការនាំចេញ។ ទី២. លើវិស័យស្វាយចន្ទី ដែលកម្ពុជាមានស្វាយ​ចន្ទី​ជាង ១លានតោន ហើយសព្វថ្ងៃស្វាយចន្ទីនេះ ពុំទាន់មានការកែច្នៃសម្រាប់ការនាំ​ចេញនៅ​ឡើយ។ ដូច្នេះសម្ដេចតេជោបានស្នើឱ្យមានការពិចារណាជំរុញការវិនិយោគ មកវិនិយោគ​លើ​ការ​កែច្នៃស្វាយចន្ទី សម្រាប់នាំចេញទៅប្រទេសអេមីរ៉ាតអារ៉ាប់រួម ផង ឬក៏នាំចេញទៅ​ប្រទេសក្រៅផង។

លើសពីនោះទៅទៀត សម្ដេចតេជោនាយករដ្ឋមន្រ្ដីក៏បានស្នើឱ្យមានការពិចារ​ណាផង​ដែរ មកធ្វើការវិនិយោគលើការកែច្នៃដំឡូង ដែលកម្ពុជាមានច្រើនសម្រាប់ធ្វើការកែច្នៃ និង​សម្រាប់ការនាំចេញ។ ព្រមជាមួយគ្នានេះដែរ សម្ដេចតេជោនាយករដ្ឋមន្ត្រី ក៏បានស្នើឱ្យភាគី​អេមីរ៉ាតអារ៉ាប់រួម ពិចារណាជំរុញឱ្យមានកិច្ចព្រមព្រៀងមិនយកពន្ធត្រួតគ្នា ដើម្បីជាការ​លើកទឹកចិត្តដល់អ្នកវិនិយោគផង និងស្នើជំរុញឱ្យមានការហោះហើរត្រង់ ពីអេមីរ៉ាតអារ៉ាប់រួម មកកាន់ព្រះរាជាណាចក្រកម្ពុជាផងដែរ។

បន្ទាប់ពីជំនួបនោះដែរ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ​ព្រះរាជាណាចក្រកម្ពុជា បានអញ្ជើញជាអធិតីភាពដ៏ខ្ពង់ខ្ពស់ ក្នុងពីធីចុះហត្ថលេខា​លើកិច្ច​ព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងកម្ពុជា និងប្រទេសអេមីរ៉ាតអារ៉ាប់រួម ដែល​ចុះហត្ថលេខាដោយ ឧត្តមបណ្ឌិត Thani bin Ahmed Al Zeyoudi រដ្ឋមន្រ្តីពាណិជ្ជ​កម្មអន្តរជាតិ នៃប្រទេសអេមីរ៉ាតអារ៉ាប់រួម និងឯកឧត្ដម ឯកឧត្តម ប៉ាន សូរស័ក្តិ រដ្ឋមន្រ្តី​ក្រសួងពាណិជ្ជកម្មកម្ពុជា៕

ដោយ៖ ជឹម ណារី