AKP ភ្នំពេញ ថ្ងៃទី១៦ ខែមីនា ឆ្នាំ២០២៣ -- ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានគូសបញ្ជាក់ថា កម្ពុជា​បំពេញ​បានលក្ខណៈវិនិច្ឆ័យនៃការ​ចាក​ចេញពីក្រុមប្រទេសអភិវឌ្ឍន៍តិចតួច(LDC) ជាលើកទី១ នៅ​ក្នុង​ឆ្នាំ២០២១ ដូច្នេះ ប្រសិនបើនៅពេលធ្វើការត្រួត​ពិនិត្យឡើងវិញនៅក្នុងឆ្នាំ២០២៤ គណៈកម្មាធិការគោលនយោបាយអភិវឌ្ឍន៍ (CDP) របស់អង្គការសហប្រជាជាតិបាន​វាយ​តម្លៃ និងផ្តល់អនុសាសន៍អំពីការចាកចេញនៅក្នុងខែកុម្ភៈ ឆ្នាំ២០២៤។ ការគូសបញ្ជាក់នេះ ក្នុងពិធីបើកសិក្ខាសាលាថ្នាក់ជាតិស្តីពី “តើគោលនយោបាយពាណិជ្ជកម្ម និងជំនួយ​ពាណិជ្ជ​កម្មអ្វីខ្លះគាំទ្រដល់កម្ពុជា បន្ទាប់ពីការចាកចេញពីប្រទេសអភិវឌ្ឍន៍តិចតួច?” ដែល​​បានប្រព្រឹត្តទៅចាប់ពីថ្ងៃទី១៥-១៦ ខែមីនា ឆ្នាំ២០២៣ នៅសណ្ឋាគារ Rosewood Phnom Penh ក្រោមការរៀបចំ និងគាំទ្រដោយ ធនាគារអភិវឌ្ឍន៍អាស៊ី (ADB), អង្គការ​សន្និ​សីទ​ពាណិជ្ជកម្ម និងការអភិវឌ្ឍរបស់សហប្រជាជាតិ (UNCTAD) និងក្រសួង​ពាណិជ្ជកម្ម។

ឯកឧត្តម សុខ សុភ័ក្ត្រ បានថ្លែងថា បន្ទាប់ពីអង្គការសហប្រជាជាតិបាន​វាយ​តម្លៃ និង​ផ្តល់អនុសាសន៍អំពីការចាកចេញនោះ ក្រុមប្រឹក្សា​សេដ្ឋកិច្ច-សង្គមរបស់អង្គការ​សហ​ប្រជាជាតិ (UN-ECOSOC) នឹងចេញសេចក្តីសម្រេចឯកភាព​យល់​ព្រមទៅលើ​អនុសាសន៍​នេះ​នៅក្នុងខែមិថុនា បន្ទាប់មកអង្គមហាសន្និបាតអាចចេញសេចក្តីសម្រេច​ចាត់វិធានការ​នៅ​ពាក់កណ្តាលខែកញ្ញា ឆ្នាំ២០២៤។ ឯកឧត្ដមរដ្ឋលេខាធិការអះអាងថា ចាប់ផ្តើមពី​ឆ្នាំនេះទៅ កម្ពុជានឹងត្រូវតែរៀបចំ និងអនុវត្តន៍យុទ្ធសាស្ត្រអន្តរកាល (transition strategy) ឱ្យបានរលូននិងមានសន្ទុះទៅមុខ ដើម្បីចៀសវាងការធ្លាក់ថយក្រោយ មកវិញ។

ឯកឧត្តមរដ្ឋលេខាធិការបានសង្កត់ធ្ងន់លើលក្ខណៈវិនិច្ឆ័យចំនួន៣ សម្រាប់ការ​មាន​លទ្ធភាពចាកចេញពីក្រុមប្រទេសអភិវឌ្ឍន៍តិចតួច(LDC) ដែលមានដូចជា Gross national income (GNI) per capita, Human Assets Index (HAI), និង Economic and Environmental Vulnerability Index (EVI) ។

សូមជម្រាបជូនថា សិក្ខាសាលានេះរៀបចំឡើងក្នុងគោលបំណងពិភាក្សាជាមួយ​អ្នក​រៀបចំគោលនយោបាយ និងវិស័យឯកជន នូវឧបករណ៍និងយុទ្ធសាស្រ្តគោលនយោ​បាយសមស្របបំផុត ទាំងនៅ​ក្នុងវិស័យគោលនយោបាយប្រពៃណី និងគោលនយោបាយ​ថ្មី ដែលរួមមាន ការបើក​ច្រកទីផ្សារ, វិធានប្រភពដើម, អនាម័យនិងភូតគាមអនាម័យ, ពាណិជ្ជ​កម្មសេវាកម្ម, ពាណិជ្ជកម្មអេឡិចត្រូនិក និងសេវាកម្មឌីជីថល។ សិក្ខាសាលាថ្នាក់​ជាតិ ក៏នឹងកំណត់​រក​សេចក្តីត្រូវការជំនួយពាណិជ្ជកម្មថ្មី ដើម្បីតម្រង់ទិសទៅរកជំនួយ​ស្រាវ​ជ្រាវ និងកសាង​សមត្ថភាព សម្រាប់គាំទ្រកម្ពុជា នៅក្នុងការអនុវត្តកិច្ចសន្យានៅ​ក្រោម​​កិច្ច​ព្រមព្រៀង​អាសិប និងកិច្ចព្រមព្រៀងពាណិជ្ជកម្មសេរី (FTA) ដទៃទៀត ព្រមទាំង បង្កើនអត្រានៃ​ការ​ប្រើប្រាស់កិច្ចព្រមព្រៀងទាំងនេះ។ ការចរចា FTA ថ្មីៗ ប្រកបដោយ ប្រសិទ្ធភាព និង កំណត់​​រកយុទ្ធសាស្ត្រគោលនយោបាយពាណិជ្ជកម្ម ដើម្បីរក្សា និងធ្វើឱ្យ​ប្រសើរឡើងច្រក​ចូលទីផ្សារនៅក្នុងប្រទេសសំខាន់ៗដែលផ្តល់ការការអនុគ្រោះ បន្ទាប់​ពី​ការចេញពីប្រទេស LDC និងស្វែងរកជម្រើសទីផ្សារផ្សេង៕

ដោយ៖ រិទ្ធី, ប្រភព៖ ក្រសួង​ពាណិជ្ជកម្ម