កម្ពុជានិងចក្រភពអង់គ្លេសកំពុងព្រាងអនុស្សារណៈដើម្បីជំរុញពាណិជ្ជកម្មបន្ថែម
AKP ភ្នំពេញ ថ្ងៃទី ១២ ខែ មករា ឆ្នាំ២០២៣ -- កម្ពុជា និង ចក្រភពអង់គ្លេស នៅពេលនេះកំពុងតែព្រាងអនុស្សារណៈនៃការយោគយល់ស្តីពីពាណិជ្ជកម្មរវាងប្រទេសទាំងពីរដើម្បីជំរុញពាណិជ្ជកម្មបន្ថែមទៀត។ នេះបើតាមការអះអាង របស់ក្រសួងការបរទេសនិងសហប្រតិបត្តិការអន្តរជាតិ ។
ប្រភពដដែលបានអះអាងថា សេចក្តីព្រាងអនុស្សារណៈដើម្បីជំរុញពាណិជ្ជកម្មបន្ថែមរវាងកម្ពុជា និង ចក្រភពអង់គ្លេស បានត្រូវលើកឡើងនៅពេលដែល ឯកឧត្តម ប្រាក់ សុខុន ឧបនាយករដ្ឋមន្រ្តី និងជា រដ្ឋមន្រ្តីការបរទេស និងសហប្រតិបត្តិការអន្តរជាតិ និង ឯកឧត្តម ដូមីនិក វីល្លៀម (Dominic Williams) ឯកអគ្គរាជទូត នៃចក្រភពអង់គ្លេស ប្រចាំកម្ពុជា ជួបគ្នា នៅក្នុងជំនួបថ្ងៃនេះនៅក្រសួង ។
ប្រភពដដែលបានបញ្ជាក់ថា “ ភាគីទាំងពីរ បានស្វាគមន៍ចំពោះការកើនឡើងនៃទំហំពាណិជ្ជកម្មទ្វេភាគី ហើយបានបង្ហាញក្តីសង្ឃឹមថា ការចរចាលើសេចក្តីព្រាងអនុស្សារណៈនៃការយោគយល់ស្តីពីពាណិជ្ជកម្មរវាងប្រទេសទាំងពីរ នឹងត្រូវបញ្ចប់ក្នុងពេលឆាប់ៗនេះ ដើម្បីជំរុញពាណិជ្ជកម្មបន្ថែមទៀត “ ។
យោងទៅតាមសិ្ថតិពីអគ្គនាយកដ្ឋានពាណិជ្ជកម្មអន្តរជាតិ (The Department for International Trade of UK), ទំហំពាណិជ្ជកម្មទ្វេរភាពគី រវាងចក្រភពអង់គ្លេស និងកម្ពុជាមានចំនួន ប្រមាណជា ៨១១ លានផោន គិតមកដល់ ត្រីមាសទី ៤ នៃឆ្នាំ ២០២២ កើនឡើង ជិត ១៤ភាគរយ ឬ ៩៩ លានផោន ។ .
ប្រភពដដែលបានបន្តថា ការនាំចេញសរុបរបស់ចក្រភពអង់គ្លេសមកកម្ពុជាមានចំនួន ១៧៤ លានផោនក្នុងត្រីមាសទី៤ នៃឆ្នាំ ២០២២ កើនឡើង ៤១,៥ ភាគរយ ឬ ៥១ លានផោន ហើយ ការនាំចូលសរុបរបស់ចក្រភពអង់គ្លេសពីប្រទេសកម្ពុជាមានចំនួន ៦៣៧ លានផោន កើនឡើង ៨,១ភាគរយ ឬ ៤៨ លានផោនធៀប ។
មកដល់ពេលនេះប្រទេសកម្ពុជាគឺជាដៃគូពាណិជ្ជកម្ម ទី ៨៧ របស់ចក្រភពអង់គ្លេស តែ មានចំនួន ត្រឹមតែ០,១ភាគរយ នៃពាណិជ្ជកម្មចក្រភពអង់គ្លេសសរុប។
ដោយ ហេង បញ្ញា