AKP ភ្នំពេញ ថ្ងៃទី០៧ ខែមករា ឆ្នាំ២០២៣--

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តីនៃព្រះរាជាណាចក្រកម្ពុជា​បាន​សម្ដែងការប្តេជ្ញាចិត្តក្នុងនាមជាសមាជិកដ៏សកម្មមួយនៃ អង្គការសហប្រជាជាតិ​ក្នុងការចូល​រួម​ជាមួយសហគមន៍អន្តរជាតិក្នុងការការពារសណ្ដាប់ធ្នាប់អន្តរជាតិដែលផ្អែកលើច្បាប់ និងការ​ពង្រឹងប្រព័ន្ធពហុភាគីនិយមដែលប្រកបដោយបរិយាបន្ន តម្លាភាព យុត្តិធម៌និងបើកចំហ​ដើម្បី​ធានាដល់ការកសាងសន្តិភាព ស្ថិរភាព ការអភិវឌ្ឍ និងការលើកកម្ពស់គុណភាពនៃជីវិត និង​ការរស់នៅរបស់ប្រជាជន។

ថ្លែងនៅក្នុងមីទ្ទីងរម្លឹកខួបលើកទី៤៤ នៃទិវាជ័យជម្នះ ៧ មករា(០៧.០១.១៩៧៩-០៧.០១.២០២៣) នាព្រឹកថ្ងៃទី០៧ ខែមករា ២០២៣ នៅខាងមុខមហោស្រព កោះពេជ្រ ដែល​មានមហាជនចូលរួមប្រមាណជាង២ ម៉ឺននាក់ សម្តេចតេជោ ហ៊ុន សែន បានថ្លែងថា ការ​ប្រែ​ប្រួលដ៏ស្មុគស្មាញតានតឹងនៃសភាពការណ៍សកលលោកបច្ចុប្បន្ននេះ ដែលបណ្តាលមក​ពី​ការប្រកួតប្រជែងខាងភូមិសាស្ត្រ នយោបាយរវាងមហាអំណាចធំៗ ដែលបានធ្វើឱ្យរង្គោះ​រង្គើ​ដល់សណ្តាប់ធ្នាប់អន្តរជាតិ និងគំរាមកំហែងដល់សន្តិភាព ស្ថិរភាពនិងវិបុលភាពជាសកល​នោះ។ សម្ដេចតេជោនាយករដ្ឋមន្រ្ដីបានបញ្ជាក់ថា កម្ពុជាសូមយកឱកាសនេះបញ្ជាក់​ជាថ្មី​នូវការប្តេជ្ញាចិត្តរបស់កម្ពុជា​ដែលជាប្រទេស​សមាជិកដ៏សកម្មមួយនៃអង្គការសហប្រជាជាតិ​ក្នុងការចូលរួមជាមួយសហគមន៍អន្តរជាតិក្នុងការ ការពារសណ្ដាប់ធ្នាប់អន្តរជាតិដែលផ្អែក​លើច្បាប់និងការពង្រឹងប្រព័ន្ធពហុភាគីនិយម ដែលប្រកបដោយបរិយាបន្ន តម្លាភាព យុត្តិធម៌ និង​បើកចំហដើម្បីធានាដល់ការ កសាងសន្តិភាព ស្ថិរភាព ការអភិវឌ្ឍ និងការលើកកម្ពស់​គុណ​ភាពនៃជីវិត និងការរស់នៅរបស់ប្រជាជន។

សម្តេចតេជោបន្តថា កម្ពុជាប្រកាន់ខ្ជាប់ធម្មនុញ្ញអង្គការសហប្រជាជាតិ និងច្បាប់ បទដ្ឋាន ព្រមទាំងគោលការណ៍ទាំងឡាយដែលត្រូវបានទទួលស្គាល់ជាសាកល ហើយ​ជំទាស់​ដាច់ ខាតចំពោះការប្រើប្រាស់កម្លាំង ឬការគំរាមកំហែងដោយកម្លាំងប្រឆាំងនឹងរដ្ឋ​អធិបតេយ្យមួយ ។ ចំពោះបញ្ហាសង្គ្រាម និងសន្តិភាពឆ្លងកាត់ប្រវត្តិសាស្ត្រដ៏ជូរចត់ដែលកម្ពុ ជាបានជួបរួចមកហើយនោះ ។

សម្តេចតេជោនាយករដ្ឋមន្រ្ដីបានបញ្ជាក់បន្ថែមថា៖ «យើងយល់ថាសង្គ្រាម​មិនអាច​បញ្ចប់ដោយសង្គ្រាមបានឡើយ គឺមានតែការដោះស្រាយជម្លោះដោយ​សន្តិវិធី​តាមរយៈ​ការ​សន្ទនា និងពិគ្រោះយោបល់ប៉ុណ្ណោះ ទើបអាចសម្រេចបាននូវសន្តិភាពប្រកបដោយចីរភាព​បាន »៕ដោយ៖ រិទ្ធី