AKP ភ្នំពេញ ថ្ងៃទី០២ ខែមករា ឆ្នាំ២០២៣ -- នាព្រឹកថ្ងៃទី០២ ខែមករា ឆ្នាំ២០២៣ នៅទីស្នាក់ការអាជ្ញាធរមីន ឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានប្រគល់សម្ភារបោសសម្អាតមីនជូន បញ្ជាការដ្ឋាន កងវិស្វកកម្មកងទ័ពជើងគោក និងបញ្ជាការដ្ឋានអង្គរក្ស ដើម្បីមានលទ្ធភាពប្រតិបត្ដិការ ជួយសង្គ្រោះ។

ឯកឧត្តម លី ធុជ បានសសើរវាយតម្លៃខ្ពស់ចំពោះកងទ័ពជើងគោក និងកងអង្គរក្ស ដែលបានខិតខំប្រឹងប្រែងលះបង់ និងពលីគ្រប់បែបយ៉ាងចូលរួមការពារសន្តិភាព និងជាតិ មាតុភូមិ ជាពិសេសការពារសុខសុវត្ថិភាពជូនសម្តេចតេជោ និងសម្តេចកិត្តិព្រឹទ្ធបណ្ឌិត ព្រម ទាំងក្រុមគ្រួសាររបស់សម្តេចទាំងទ្វេ។

ឯកឧត្តម ទេសរដ្ឋមន្រ្តី លី ធុជ បានបញ្ជាក់បន្ថែមថា បច្ចុប្បន្ននេះ កងទ័ពជើងគោក មិនត្រឹមតែការពារបូរណភាពទឹកដី និងការពារសន្តិភាពប៉ុណ្ណោះទេ ថែមទាំងបានទទួលនូវការ ហ្វឹកហ្វឺនជំនាញ បំពាក់សម្ភារ និងចូលរួមដល់ការងារបោសសម្អាតមីនមនុស្សធម៌ផងដែរ ហើយថ្មីៗនេះ បានចូលរួមធ្វើការបោសសម្អាតមីន ក្នុងគម្រោងសម្តេចតេជោសម្រាប់ សកម្មភាពមីនផ្តល់ដីសុវត្ថិភាព បង្កើតស្នាមញញឹមប្រកបដោយជំនាញ។

ឯកឧត្តមទេសរដ្ឋមន្ត្រី អនុប្រធានទី១ បន្តទៀតថា សម្ភារដែលប្រគល់ជូននាថ្ងៃនេះ កងទ័ពជើងគោក នឹងយកទៅប្រើប្រាស់ក្នុងគោលដៅពន្លឿនការងារបោសសម្អាតមីន ដើម្បី ឈានទៅសម្រេចបាននូវទស្សនវិស័យរបស់សម្តេចតេជោ នាយករដ្ឋមន្រ្តី ឆ្ពោះទៅរកកម្ពុជា គ្មានមីនឆ្នាំ២០២៥។

សូមបញ្ជាក់ថា  សម្ភារបោសសម្អាតមីនបានធ្វើការបែងចែកដូចជា៖ បញ្ជាការដ្ឋានកង វិស្វកកម្មកងទ័ពជើងគោក ទទួលបានម៉ាស៊ីនរាវមីនចំនួន១៥០ ឃីដចំនួន១៥០ អាវការពារ ចំនួន៤០ និងឧបករណ៍គ្រឿងបំផ្ទុះចំនួន៨៥ សរុបជាថវិកាចំនួន ៧៤៥ ៧៧៥ ដុល្លារអាម៉េរិក ទទួលដោយ ឯកឧត្តម ឧត្តមសេនីយ៍ឯក អ៊ុច វ៉ាន់ថា មេបញ្ជាការរង កងទ័ពជើងគោក និងជា មេបញ្ជាការកងវិស្វកម្មកងទ័ពជើងគោគ តំណាងឯកឧត្តម ឧត្តមសេនីយ៍ឯកបណ្ឌិត ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការ នៃបញ្ជាការដ្ឋាន កងទ័ពជើងគោក។ បញ្ជាការដ្ឋានអង្គរក្ស ទទួលបានម៉ាស៊ីនរាវមីនចំនួន១០ និងឃីដ ចំនួន ១០ សរុបជាថវិកាចំនួន ៣៩ ៧៧៥ដុល្លារអាម៉េរិក ទទួលដោយ ឯកឧត្តម ឧត្តម សេនីយ៍ឯក ប្រាជ្ញ សុផល មេបញ្ជាការរងបញ្ជាការដ្ឋានអង្គរក្ស តំណាងឯកឧត្តម នាយឧត្តមសេនីយ៍ កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងកងយោធពល ខេមរភូមិន្ទ និងជាមេបញ្ជាការ បញ្ជាការដ្ឋានអង្គរក្ស៕

ដោយ សួស  សំរិត