AKP ភ្នំពេញ ថ្ងៃទី២៣ ខែតុលា ឆ្នាំ២០២២ --សម្ដេចអគ្គមហាពញាចក្រី ហេង សំរិន ប្រធានរដ្ឋសភាបានលើកឡើងថា កិច្ចព្រម ព្រៀង​សន្តិភាពទីក្រុងប៉ារីស បាននាំមកនូវការបង្រួបបង្រួមជាតិ ផ្សះផ្សាជាតិ សុខសន្តិភាព និង​ការអភិវឌ្ឍប្រទេសជាតិរបស់ យើងរហូតមកដល់សព្វថ្ងៃនេះ។ ការលើកឡើងរបស់សម្ដេច​ប្រធានរដ្ឋសភានេះ ក្នុងឱកាសអបអរសាទរខួប៣១ឆ្នាំ នៃកិច្ចព្រមព្រៀងសន្តិភាព​ទីក្រុង​ប៉ារីស។

នៅលើផេកហ្វេសប៊ុកផ្លូវការ នាព្រឹកថ្ងៃទី២៣ ខែតុលា ឆ្នាំ២០២២ សម្ដេចអគ្គម​ហា​ពញាចក្រី ហេង សំរិន បានថ្លែងថា ថ្ងៃទី២៣ ខែតុលា ឆ្នាំ២០២២នេះ ជាខួប ៣១ឆ្នាំ (២៣​តុលា ១៩៩១-២៣តុលា ២០២១) នៃកិច្ចព្រមព្រៀងសន្តិភាព ទីក្រុង​ប៉ារីស។ សម្ដេចប្រធាន​បានថ្លែងបញ្ជាក់ថា ៣១ឆ្នាំមុន ពោលគឺនៅថ្ងៃទី២៣ ខែតុលា ឆ្នាំ១៩៩១ ភាគីខ្មែរទាំង៤ រួម​មាន រដ្ឋាភិបាលកម្ពុជា តំណាងដោយ សម្តេចតេជោ ហ៊ុន សែន ចលនាតស៊ូហ៊្វុនស៊ិនប៉ិច តំណាង​ដោយសម្តេចព្រះ នរោត្តម សីហនុ និងសម្តេចក្រុមព្រះ នរោត្តម រណប្ញទ្ឋិ រណសិរ្ស​ជាតិ​រំដោះប្រជាពលរដ្ឋខ្មែរ ដែលតំណាងដោយ លោក សឺន សាន និង ក្រុមចលនាកម្ពុជា​ប្រជាធិបតេយ្យតំណាងដោយ លោក ខៀវ សំផន បានចុះហត្ថលេខា លើកិច្ចព្រមព្រៀង​សន្តិភាព នៅទីក្រុងប៉ារីស ប្រទេសបារាំង ក្រោមវត្តមានសាក្សីមកពី១៨​ប្រទេស រួមទាំងអគ្គ​លេខាធិការអង្គការសហប្រជាជាតិ (UN) ផងដែរ ដើម្បីបញ្ចប់សង្រ្គាម​ស៊ីវិលនៅកម្ពុជា។

សម្ដេចប្រធានរដ្ឋសភាបានអះអាងថា សុខសន្តិភាពជាកក្តាសំខាន់ចាំបាច់ មិនអាច​ខ្វះបានឡើយ សម្រាប់ការអភិវឌ្ឍប្រទេសជាតិ ដូច្នេះសូមបងប្អូនជនរួមជាតិ រួមគ្នាថែរក្សា​សុខសន្តិភាព ដែលយើងបានស្វែងរកបានដោយលំបាកនេះឱ្យគង់វង់ស្ថិតស្ថេរដើម្បី​ប្រទេស​យើងទទួលបានការអភិវឌ្ឍ ជារៀងរហូតទៅ៕

ដោយ៖ រិទ្ធី