ក្រសួងទេសចរណ៍៖ ក្នុងសប្ដាហ៍ដើមខែតុលានេះ ទទួលបានភ្ញៀវជាង៣៧ម៉ឺននាក់ ក្នុងនោះ ខេត្ដព្រះសីហនុ ទទួលបានច្រើនជាងគេ
AKP ភ្នំពេញ ថ្ងៃទី១២ ខែតុលា ឆ្នាំ២០២២ -- ភ្ញៀវទេសចរផ្ទៃក្នុងប្រចាំសប្តាហ៍ នាថ្ងៃទី០៨-០៩ ខែតុលា ឆ្នាំ២០២២ មានចំនួនសរុប៣៧៤ ៨៩៥ នាក់ ក្នុងនោះភ្ញៀវជាតិ មានចំនួន ៣៥២ ៨៨៤ នាក់ និងភ្ញៀវបរទេសផ្ទៃក្នុងមានចំនួន ២២ ០១១ នាក់។ ចំពោះតួលេខខាងលើមានការកើនឡើង២៤.៨ភាគរយ បើធៀបនឹងសប្តាហ៍ធម្មតាមុនពិធីបុណ្យភ្ជុំបិណ្ឌ។ នេះបើយោងតាមក្រសួងទេសចរណ៍។
បើតាមក្រសួងទេសចរណ៍បានឱ្យដឹងថា ការដាក់ឱ្យដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ គឺបានទាក់ទាញចរន្តភ្ញៀវទេសចរឱ្យទៅលេងកម្សាន្តនៅខេត្តព្រះសីហនុច្រើនជាងគេ ដែលមានចំនួន ១២៨ ៣០៧ នាក់។ ការដាក់ឱ្យដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ គឺមានរយៈពេល១ខែ ចាប់ពីថ្ងៃទី០១-៣១ ខែតុលា ឆ្នាំ២០២២ ដោយមិនមានការបង់ប្រាក់ និងការអភិវឌ្ឍហេដ្ឋារចនាសម្ព័ន្ធ ពិសេសការរៀបចំឆ្នេរខ្សាច់កម្សាន្ត និងការរៀបចំការពារសន្តិសុខ សណ្តាប់ធ្នាប់ អនាម័យ បរិស្ថានបានយ៉ាងល្អប្រសើរ ដែលជាការទាក់ទាញភ្ញៀវទេសចរជាតិ និងអន្តរជាតិចង់មកកម្សាន្តក្នុងខេត្តព្រះសីហនុ។
ក្រៅពីនេះ ក៏មានគោលដៅខេត្តបាត់ដំបង មានចំនួន ៨៨ ៨៦៨ នាក់ ខេត្តកំពង់ ចាម ៤៧ ៤៥៨ នាក់ ខេត្តសៀមរាប ២៣ ៦៦៥ នាក់ រាជធានីភ្នំពេញ ១៧,០៤៥ នាក់ និងខេត្តកំពត ១៤ ៤១៦ នាក់។ សម្រាប់រាជធានី-ខេត្តទាំង៦នេះសុទ្ធតែជាគោលដៅដែលទទួលបានភ្ញៀវទេសចរច្រើនជាងគេ នាសប្ដាហ៍ដើមខែតុលាឆ្នាំ២០២២នេះ។
ក្រសួងទេសចរណ៍បានបញ្ជាក់ដោយអនុវត្តន៍តាមការសម្រេចរបស់រាជរដ្ឋាភិបាល បណ្តាខេត្តមួយចំនួនដែលនៅជាប់បណ្តោយដងទន្លេបានរៀបចំព្រឹត្តិការណ៍ប្រណាំងទូកក្នុងខេត្ត ហើយខេត្តខ្លះទៀត បានកំពុងត្រៀមរៀបចំព្រឹត្តិការណ៍នេះទៅតាមពេលវេលាសមស្រប និងស្ថានភាពជាក់ស្តែងក្នុងមូលដ្ឋានរបស់ខ្លួន។ ជាក់ស្តែង កាលពីថ្ងៃទី០៩-១០ ខែតុលានេះ ខេត្តបាត់ដំបង បានប្រារព្ធពិធីបុណ្យអុំទូកចេញព្រះវស្សានៅដងស្ទឹងសង្កែ ក្រុងបាត់ដំបង អមជាមួយព្រឹត្តិការណ៍កម្សាន្តសប្បាយមួយចំនួនទៀត ដែលបាទាក់ទាញភ្ញៀវទេសចរ និងប្រជាពលរដ្ឋក្នុងខេត្ត និងបណ្តាខេត្តជិតខាងឱ្យទៅកម្សាន្តជាច្រើនផងដែរ។ ទន្ទឹមនេះ បណ្តារដ្ឋបាលរាជធានី-ខេត្ត និងគណៈបញ្ជាកាឯកភាពបានយកចិត្តទុកដាក់ខ្ពស់ក្នុងការគ្រប់គ្រងស្ថានភាពទឹកជំនន់ក្នុងមូលដ្ឋានខ្លួន ការចុះចែកស្បៀងអាហារសម្រាប់ប្រជាពលរដ្ឋដែលរងគ្រោះ រួមជាមួយការដាក់ចេញវិធានការសង្គ្រោះក្នុងករណីបន្ទាន់ផងដែរ៕
ដោយ៖ រិទ្ធី, ប្រភព៖ ក្រសួងទេសចរណ៍