AKP ភ្នំពេញ ថ្ងៃទី២១ ខែកញ្ញា ឆ្នាំ២០២២ -- ធនាគារអភិវឌ្ឍន៍អាស៊ី(ADB)បានរក្សាការព្យាករណ៍កំណើនសេដ្ឋកិច្ចរបស់ខ្លួន​ សម្រាប់​ប្រទេស​កម្ពុជានៅកម្រិត៥,៣ភាគរយ ក្នុងឆ្នាំ២០២២ ប៉ុន្តែ​បានបន្ទាបការព្យាករណ៍​ឆ្នាំ២០២៣ ​មកនៅត្រឹម៦,២ភាគរយ ពី៦,៥ ភាគរយ​ ដោយសារការចុះ​ខ្សោយនៃកំណើន​សេដ្ឋកិច្ចពិភពលោក។

យោងតាមការធ្វើបច្ចុប្បន្នភាពនៃទស្សនៈវិស័យអភិវឌ្ឍន៍អាស៊ី ឆ្នាំ២០២២ (ADO​ 2022 Update)​ចេញផ្សាយនៅថ្ងៃទី២១ ខែកញ្ញា ឆ្នាំ២០២២ បានឱ្យដឹងថា ការនាំចេញ​ផលិតផលសម្លៀកបំពាក់ទំនិញធ្វើដំណើរ និងស្បែកជើងរបស់កម្ពុជានៅតែរឹងមាំ ជាមួយ កំណើន​៣៩,៨ភាគរយ ក្នុងឆមាសទីមួយនៃឆ្នាំ២០២២នេះ ធៀបនឹងរយៈពេលដូចគ្នា​កាល​ពីឆ្នាំមុនបើទោះបីជាមានការថយចុះនៃកំណើនសេដ្ឋកិច្ចសហរដ្ឋអាមេរិក និងអឺរ៉ុបក៏​ដោយ។ វិស័យកម្ម​ន្តសាលមិនមែន​កាត់ដេរ​បាន​បន្ត​សន្ទុះ​កំណើន​ដ៏រឹងមាំ ខណៈ វិស័យ​សំណង់​បាន​ងើប​ឡើង​វិញ​ជា​បណ្តើរៗជាមួយ​ការ​នាំ​ចូល​សម្ភារ​សំណង់​កើន​ឡើង២២,៨​ភាគរយ។ ចំណែកវិស័យឧស្សាហកម្មត្រូវបានព្យាករណ៍ថានឹងកើនឡើង៩,១ភាគរយ នៅ​ឆ្នាំនេះ មុនពេលថយមកត្រឹម៨,៦ភាគរយ នៅឆ្នាំ២០២៣​ដោយសារការចុះ​ខ្សោយនៃតម្រូវ​ការក្រៅស្រុក។

លោកស្រី Jyotsana Varma នាយិកា ADB ប្រចាំកម្ពុជា  បានលើកឡើងថា​ ការកើន​ឡើងនៃការនាំចេញផលិតផលកម្មន្តសាលរបស់កម្ពុជានិងការងើបឡើងវិញបន្តិចម្តងៗក្នុងវិស័យសំណង់និងសេវាកម្មបានជួយដល់កំណើនសេដ្ឋកិច្ចនៅឆ្នាំ២០២២  ទោះបីជាមាន​ការ​ថយចុះ​នៃកំណើនវិស័យកសិកម្មដែលបណ្តាលមកពីការកើនឡើងនៃថ្លៃប្រេងឥន្ធនៈ​ និងជី ព្រមទាំងភ្លៀងធ្លាក់ខ្លាំងក៏ដោយ។​លោកស្រីបានបញ្ជាក់ថា៖ «អន្តរាគមន៍សេដ្ឋ​កិច្ច​សង្គមរបស់រាជរដ្ឋាភិបាលដូចជាកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរង​គ្រោះ​ បាននិងកំពុងមានប្រសិទ្ធភាពក្នុងការកាត់បន្ថយផល​ប៉ះពាល់នៃការកើនឡើង​ថ្លៃ​ទំនិញលើ​ពិភព​លោក​សម្រាប់ពលរដ្ឋ​ក្រីក្រ»។

របាយការណ៍ខាងលើបានដំឡើងការព្យាករណ៍អតិផរណាឆ្នាំ២០២២របស់កម្ពុជាទៅ៥,០ភាគរយ ពីការព្យាករ ៤,៧ភាគរយ ក្នុងខែមេសាដោយសារឥទ្ធិពលរាលដាល​នៃ​ការ​កើនឡើងតម្លៃប្រេងឥន្ធនៈដែលបណ្តាលមកពីការឈ្លានពានរបស់រុស្ស៊ី​លើអ៊ុយក្រែន។​ចំពោះការព្យាករណ៍អតិផរណាសម្រាប់ឆ្នាំ២០២៣ត្រូវបានរក្សាទុកនៅ២,២ភាគរយ ។

ហានិភ័យសម្រាប់ទស្សនវិស័យនេះរួមមានការលចឡើងនៃមេរោគកូវីដ១៩ប្រភេទថ្មីនិងជំងឺអុតស្វាកំណើនឆាប់រហ័សនៃកម្ចីមិនដំណើរការកំណើនសេដ្ឋកិច្ចនៃដៃគូពាណិជ្ជកម្មសំខាន់ៗមានភាពកាន់តែទន់ខ្សោយការរំខាននានាដល់ខ្សែសង្វាក់ផ្គត់ផ្គង់ជាសកលនិងការកើនឡើងនៃថ្លៃថាមពលនិងទំនិញនានាដែលអាចអាក្រក់ជាងការរំពឹងទុក។

លោកស្រី Jyotsana Varma បានថ្លែងបញ្ជាក់ថា៖ «ការគាំទ្ររបស់ ADB ដល់កម្ពុជា​គឺ​ស្របទៅនឹងអាទិភាពកំណើនរបស់រាជរដ្ឋាភិបាល។ បច្ចុប្បន្ន ADB ​កំពុង​អនុវត្តន៍​គម្រោង​វិនិយោគ​ដែលមានទឹកប្រាក់២,៤៣ពាន់​លាន​ដុល្លារ​នៅ​កម្ពុជា»។

សូមជម្រាបជូនថា នៅឆ្នាំ២០២១ ADB បានសន្យាផ្តល់ប្រាក់កម្ចី​និងជំនួយ​សម្រាប់​ស្ថាប័នរដ្ឋចំនួន៣២៧,១លានដុល្លារ ហើយបានកៀរគរបន្ថែម៥លានដុល្លារ​តាមរយៈ​សហ​ហិរញ្ញប្បទានសម្រាប់កម្ពុជា។ សម្រាប់ប្រាក់កម្ចីត្រៀមរបស់ ADB សម្រាប់កម្ពុជា​ឆ្នាំ២០២២-២០២៥ រួមមានការផ្តល់កម្ចីសម្បទានចំនួន១,១៧ពាន់លានដុល្លារ និងជំនួយ ចំនួន៤៣,៩លានដុល្លារ ដើម្បីគាំទ្រដល់ការអភិវឌ្ឍសេដ្ឋកិច្ចរបស់ប្រទេស និងការស្តារ ឡើងវិញពីជំងឺរាតត្បាតកូវីដ-១៩៕

ដោយ រិទ្ធី, ប្រភព៖ ADB