កម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកប ដោយ ភាពធន់ក្នុងទឹកប្រាក់៨៧លានដុល្លារ អូស្ត្រាលីត្រូវ បានបើកឱ្យដំណើរ
AKP សៀមរាប ថ្ងៃទី១៧ ខែកញ្ញា ឆ្នាំ២០២២-ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ របស់ក្រសួងសេដ្ឋកិច្ច និងហិរញ្ញវត្ថុកម្ពុជា និងឯកឧត្តម ព្រឹទ្ធសមាជិក Tin Ayres ឧបការីរដ្ឋមន្ត្រីក្រសួងពាណិជ្ជកម្ម និងជាឧបការីរដ្ឋ មន្ត្រីក្រសួងផលិតកម្មរបស់អូស្ត្រាលី នៅរសៀលថ្ងៃទី១៧ខែកញ្ញាឆ្នាំ២០២២នេះ បានបើកដំណើរការកម្មវិធីថ្មី ឈ្មោះថា ភាពជាដៃ គូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ Cambodia Australia Partnership for Resilient Economic Development (CAP RED) ដែលមានថវិកា ៨៧លាន ដុល្លារអូស្ត្រាលី។ ពិធីនេះបានធ្វើនៅសណ្ឋាគារសូហ្វីតែល ក្រុងសៀមរាប ខេត្តសៀមរាប។
CAP RED ជាកម្មវិធីថ្មី មានរយៈពេល៥ឆ្នាំ ដែលត្រូវបានបង្កើតឡើង ផ្អែកលើជំនួយជាង មួយទសវត្សរ៍របស់អូស្ត្រាលីដល់វិស័យ កសិកម្ម និងហេដ្ឋារចនាសម្ព័ន្ធនៅកម្ពុជា តាម រយៈកម្មវិធីខ្សែសង្វាក់ តម្លៃកសិកម្មកម្ពុជា-អូស្ត្រាលី (CAVAC) និងកម្មវិធីវិនិយោគ លើវិស័យហេដ្ឋារចនាសម្ព័ន្ធ ដែលទើបតែបានបញ្ចប់ថ្មីៗនេះ។ កម្មវិធីទាំងពីរដែលទើបតែបានបញ្ចប់នេះ បានផ្ដល់អត្ថប្រយោជន៍ ដល់ប្រជាជន កម្ពុជានៅតាមជនបទ ជាងពីរលាននាក់។
កម្មវិធីCAP-RED ត្រូវបានបង្កើតឡើង បន្ទាប់ពីមានការពិគ្រោះយោបល់ដ៏ទូលំទូលាយជាមួយ ទាំងវិស័យសាធារណៈ និងឯកជន អំពីមធ្យោបាយដ៏ល្អប្រសើរបំផុត ដើម្បីជួយសេដ្ឋកិច្ចកម្ពុជាស្ដារឡើង វិញបន្ទាប់ពីជំងឺកូដ-១៩។ កម្មវិធី CAP RED នឹងជួយដល់ រាជរដ្ឋាភិបាលកម្ពុជា និងសមភាគីពាក់ព័ន្ធផ្សេងៗទៀត បង្កើតគោលនយោបាយនានា ដែលជំរុញកំណើនសេដ្ឋកិច្ចប្រកបដោយ បរិយាបន្ន ភាពធន់ និងនិរន្តរភាព។
ឯកឧត្តម ព្រឹទ្ធសមាជិក Tin Ayres បានមានប្រសាសន៍ថា “ឆ្នាំនេះជាខួបទី៧០ឆ្នាំ នៃទំនាក់ ទំនងការទូតរវាងកម្ពុជា និងអូស្ត្រាលី ហើយកម្មវិធី CAP RED ជាភស្តុតាងរឹតតែច្បាស់បន្ថែមភាពជាដៃគូដ៏យូរអង្វែងរបស់យើងជាមួយប្រទេសកម្ពុជា។ យើងត្រូវចែករំលែក ចំណេះដឹង និងជំនាញ ជាមួយសមភាគីកម្ពុជារបស់យើង ដើម្បីបង្កើតបរិយាកាសអំណោយផលសម្រាប់ការវិនិយោគផលិតភាព និងពាណិជ្ជកម្ម»។ ឯកឧត្តមបន្តថា ដើម្បីសម្រេចបាននូវលទ្ធផលទាំងនេះ កម្មវិធីនេះនឹងធ្វើការយ៉ាងជិតស្និទ្ធជាមួយក្រសួងពាក់ព័ន្ធ និងផ្នែកពាក់ព័ន្ធនានាក្នុងវិស័យចំនួនបី ដើម្បីជំរុញកំណើន៖ សេវាហេដ្ឋារចនាសម្ព័ន្ធ កសិកម្មនិងកសិ-កែច្នៃ ព្រមទាំងការអភិវឌ្ឍ ពាណិជ្ជកម្មការវិនិយោគ និងសហគ្រាស។ សម្រាប់កម្មវិធីនេះនឹងផ្ដោតសំខាន់ ខ្លាំងលើការចែករំលែកការស្រាវជ្រាវ និងចំណេះដឹង ព្រមទាំងផ្ដោតលើសមភាពយេនឌ័រ ពិការភាព និង បរិយាបន្នសង្គម ផងដែរ។
ឯកឧត្តម វង្សី វិស្សុត បានថ្លែងថា “កម្មវិធី CAP RED ជាការរួមចំណែកយ៉ាងសំខាន់ ទៅដល់របៀបវារៈនៃការអភិវឌ្ឍសេដ្ឋកិច្ចរបស់ កម្ពុជា ដែលគាំទ្រដល់ការស្ដារឡើងវិញភាពធន់ និងកំណែទម្រង់។ ឯកឧត្តមបញ្ជាក់ថា កម្មវិធីនេះនឹងលើកទឹកចិត្តដល់ការវិនិយោគ សាធារណៈ និងឯកជន ប្រកបដោយបរិយាបន្ន ដើម្បីជួយជំរុញ សេដ្ឋកិច្ចអោយកាន់តែមានភាពចម្រុះ និងបរិយាបន្ន។
ឯកឧត្តមបន្ថែមថា តាមរយៈភាពជាដៃគូនេះ យើងរំពឹងថា គ្រួសារកម្ពុជាមួយចំនួន ជាពិសេសគ្រួសារមកពីជនបទ ក្នុងប្រទេសកម្ពុជា ជាពិសេសស្ត្រី កុមារ មនុស្សចាស់ ជនមានពិការភាព និងក្រុមងាយរងគ្រោះ នឹងមានជីវភាពប្រសើរឡើង៕
ដោយ ឃុត សៅ