កម្ពុជាត្រៀមបញ្ជូនកងកម្លាំងកម្ទេចគ្រឿងផ្ទុះ(EOD) ថ្មីចំនួន១០១នាក់ ទៅបំពេញបេសកកម្មសន្តិភាព ក្រោមឆត្រអង្គការសហប្រជាជាតិនៅសាធារណរដ្ឋអាហ្វ្រិកកណ្តាល
AKP ភ្នំពេញ ថ្ងៃទី១៥ ខែកញ្ញា ឆ្នាំ២០២២ -- កាលពីព្រឹកថ្ងៃទី១៥ ខែកញ្ញា ឆ្នាំ២០២២ នៅមជ្ឈមណ្ឌលជាតិរក្សាសន្តិភាព ( NPMEC ) បានបើកកិច្ចប្រជុំការងារ ដើម្បីត្រៀមរៀបចំបញ្ជូនកងកម្លាំងកម្ទេចគ្រឿងផ្ទុះ(EOD) ថ្មីចំនួន១០១ នាក់ ទៅចូលរួមបំពេញបេសកកម្មសន្តិភាព ក្រោមឆត្រអង្គការសហប្រជាជាតិ នៅសាធារណរដ្ឋអាហ្វ្រិកកណ្តាលនាពេលខាងមុខ ក្រោមអធិបតីភាពឯកឧត្តម នាយឧត្ដម សេនីយ៍ សែម សុវណ្ណនី អនុប្រធានគណៈកម្មាធិការជាតិ និងជាអគ្គនាយកមជ្ឈមណ្ឌល ជាតិគ្រប់គ្រងកងកម្លាំងរក្សាសន្តិភាពបោសសម្អាតមីន និងកាកសំណល់សង្គ្រាម។
ក្នុងកិច្ចប្រជុំនោះដែរ ក៏មានការចូលរួមពីសំណាក់ ឯកឧត្តម លោកជំទាវ អគ្គនាយករង នាយក នាយកដ្ឋាន និងប្រធានជំនាញ និងនាយទាហាន នាយទាហានរងតាមបណ្តាកង នៃមជ្ឈមណ្ឌលជាតិជាច្រើនរូបទៀត។
នៅក្នុងកិច្ចប្រជុំនោះ ឯកឧត្តម នាយឧត្ដមសេនីយ៍ សែម សុវណ្ណនី បានលើកឡើង ពីសម្ភារ គ្រឿងបំពាក់ និងបញ្ហាប្រឈមនានា របស់កងកម្ទេចគ្រឿងផ្ទុះ (EOD )ថ្មី និងប្រាប់ពីរបៀបថែទាំគ្រឿងសម្ភារ បំពាក់ របស់កងកម្ទេចគ្រឿងផ្ទុះ មុនចេញទៅបំពេញ បេសកកម្ម នៅសាធារណរដ្ឋអាហ្វិ្រកកណ្តាលនាចុងឆ្នាំនេះផងដែរ៕
ដោយសំ សាម៉ន