AKP ភ្នំពេញ ថ្ងៃទី០២ ខែសីហា ឆ្នាំ២០២២​ -- រដ្ឋមន្ត្រីការបរទេសបានយល់ស្របទៅលើការបន្តផែនកាសកម្មភាពពង្រឹងការបន្តអនុវត្តន៍សន្ធិសញ្ញាស្ដីពីតំបន់អាស៊ីអគ្នេយ៍គ្មានអាវុធនុយក្លេអ៊ែរសម្រាប់ឆ្នាំ២០១៨ដល់ឆ្នាំ២០២២ ចំនួន៥ឆ្នាំទៀត គឺពីឆ្នាំ២០២៣ រហូតដល់ឆ្នាំ២០២៧ ដើម្បីធានានិរន្តរភាពនៃការអនុវត្តសន្ធិសញ្ញាមួយនេះឱ្យមានប្រសិទ្ធភាពខ្ពស់។​ នេះបើតាមការថ្លែងឱ្យដឹងរបស់ឯកឧត្ដម គង់ ភោក រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងជាអ្នកនាំពាក្យសម្រាប់កិច្ចប្រជុំរដ្ឋមន្រ្តីការបរទេសអាស៊ានបានបញ្ជាក់ នៅក្នុងសន្នសីទសារព័ត៌មាន នារសៀលថ្ងៃទី០២ ខែសីហា ឆ្នាំ២០២២ នៅសណ្ឋាគារសុខាភ្នំពេញ។

ឯកឧត្ដម គង់ ភោគ មានប្រសាសន៍ថា ថ្ងៃនេះមានកិច្ចប្រជុំសរុបចំនួនបួន គឺទី១ កិច្ចប្រជុំគណៈកម្មាការតំបន់អាស៊ីអគ្នេយ៍គ្មានអាវុធនុយក្លេអ៊ែរ ទី២ កិច្ចប្រជុំរវាងរដ្ឋមន្ត្រីការបរទេសជាមួយ និងគណៈកម្មការអន្តររដ្ឋាភិបាលអាស៊ានស្ដីអំពីសិទ្ធិមនុស្ស និងកិច្ចប្រជុំពីរទៀត គឺជំនួបទ្វេភាគីរវាងឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិ ជាមួយនឹងដៃគូ ដែលក្នុងនោះមានអគ្គលេខាធិការអាស៊ាន និងក្រិក។ ចំពោះកិច្ចប្រជុំរដ្ឋមន្ត្រីការបរទេសទៅលើបញ្ហាតំបន់អាស៊ីអគ្នេយ៍គ្មានអាវុធនុយក្លេអ៊ែរ បាន ពិភាក្សាទៅលើការវិវត្តការរីកចម្រើននៃការអនុវត្តផែនការសកម្មភាព ដើម្បីពង្រឹងការអនុវត្តសន្ធិសញ្ញាស្ដីតំបន់អាស៊ីអគ្នេយ៍គ្មានអាវុធនុយក្លេអ៊ែរ ២០១៨ រហូតដល់ឆ្នាំ២០២២។

ជាលទ្ធផលនៃកិច្ចប្រជុំគណៈកម្មាការតំបន់អាស៊ីអគ្នេយ៍គ្មានអាវុធនុយក្លេអ៊ែរ គឺរដ្ឋមន្ត្រីការបរទេសអាស៊ានបានយល់ស្របទៅលើការបន្តផែនកាសកម្មភាពពង្រឹងការបន្តអនុវត្តសន្ធិសញ្ញាស្ដីពីតំបន់អាស៊ីអគ្នេយ៍គ្មានអាវុធនុយក្លេអ៊ែរសម្រាប់ឆ្នាំ២០១៨ដល់ឆ្នាំ២០២២ ចំនួន៥ឆ្នាំទៀត គឺពីឆ្នាំ២០២៣ រហូតដល់ឆ្នាំ២០២៧ ដើម្បីធានានិរន្តរភាពនៃការអនុវត្តសន្ធិសញ្ញាមួយនេះឱ្យមានប្រសិទ្ធភាពខ្ពស់។ ទន្ទឹមនេះ រដ្ឋមន្ត្រីការបរទេសក៏បានឯកភាពគ្នា ជូនប្រទេសសមាជិកពិគ្រោះយោបល់ផ្ទៃក្នុង ដើម្បីស្វែរកដំណោះស្រាយបញ្ហាលេចធ្លោពាក់ព័ន្ធនិងការចុះហត្ថលេខាលើពិធីសារនៃសន្ធិសញ្ញាលើតំបន់អាស៊ីអគ្នេយ៍គ្មានអាវុធនុយក្លេអ៊ែរ។ ជាមួយគ្នានេះដែរ  ប្រទេសសមាជិកអាស៊ានបានកោតសរសើរចំពោះកិច្ចខិតខំប្រឹងប្រែងរបស់កម្ពុជានៅក្នុងនាមជាប្រធានអាស៊ាន ដែលបានដាក់ចេញនៅសេចក្តីថ្លែងការណ៍រដ្ឋមន្ត្រីការបរទេសអាស៊ានស្តីពីការរំសាយសព្វាវុធក្នុងការមិនសាយភាយអាវុធកាលពីខែកុម្ភៈ ឆ្នាំ២០២២។ ឯកឧត្ដមរដ្ឋលេខាធិការបានឱ្យដឹងដែរថា ចំពោះកិច្ចប្រជុំរវាងរដ្ឋមន្ត្រីការបរទេសជាមួយ និងគណៈកម្មការអន្តររដ្ឋាភិបាលអាស៊ានស្ដីអំពីសិទ្ធមនុស្ស គឺបានពិភាក្សាគ្នាអពីរបាយការណ៍ប្រចាំឆ្នាំ២០២២ របស់គណៈកម្មការអន្តររដ្ឋាភិបាលអាស៊ានទទួលបន្ទុសិទ្ធមនុស្ស ដែលក្នុងរបាយការណ៍គឺបានជូនព័ត៌មានទៅដល់រដ្ឋមន្ត្រីការបរទេសអំពីកាលានុវត្តភាព ក៏ដូចជាសកម្មភាពនិងកម្មវិធីផ្សេងៗ ដែលគណៈកម្មការអន្តររដ្ឋាភិបាលអាស៊ានទទួលបន្ទុកសិទ្ធិមនុស្សបានធ្វើក្នុងឆ្នាំ២០២២ ដើម្បីជូនជាព័ត៌មាន ក៏ដូចជា ផ្ដល់លទ្ធភាពនិងឱកាសជូនរដ្ឋមន្ត្រីការបរទេស ដើម្បីផ្ដល់ជាយោបល់បន្ថែម ថាតើគណៈកម្មការមួយនេះគួរយកការងារអ្វីបន្ថែមទៀតទៅថ្ងៃក្រោយ។ បណ្ដារដ្ឋមន្ត្រីការបរទេសក៏បានវាយតម្លៃខ្ពស់ និងកោតសរសើរចំពោះតំណាងគណៈកម្មការអន្តររដ្ឋាភិបាលមួយនេះ ដែលបានខិតខំបំពេញការងារជាច្រើនដើម្បីជំរុញការលើកតម្កើង ក៏ដូចជា ការការពារសិទ្ធមនុស្ស។ ចំពោះលទ្ធផលកិច្ចប្រជុំរវាងរដ្ឋមន្ត្រីការបរទេសជាមួយ និងគណៈកម្មការអន្តររដ្ឋាភិបាលអាស៊ានស្ដីអំពីសិទ្ធិមនុស្ស គឺ រដ្ឋមន្ត្រីការបរទេសអាស៊ានបានយល់ស្របសំណើរបស់គណៈកម្មការអន្តររដ្ឋាភិបាល ក្នុងការ បោះពុម្ភផ្សព្វផ្សាយលទ្ធផលនៃរបាយការណ៍ប្រចាំឆ្នាំ២០២២។ ក្នុងកិច្ចប្រជុំនេះក៏មានការលើកឡើងអំពីលទ្ធភាពក្នុងការ ពិនិត្យឡើងវិញរបស់គណៈកម្មការអន្តររដ្ឋាភិបាលមួយនេះ ដើម្បីធានាថាពួកគាត់បន្តបំពេញការងារប្រកបដោយប្រសិទ្ធភាព នូវតែអាចចូលរួមចំណែកការការពារ ក៏ដូចជាការលើកតម្កើងសិទ្ធិមនុស្សនៅក្នុងតំបន់អាស៊ាន ក៏ដូចជានៅក្នុងប្រទេសជាសមាជិកអាស៊ាននីមួយៗឱ្យទទួលបានជោគជ័យ៕

ដោយ ជឹម ណារី