នាយកប្រចាំតំបន់អាស៊ីប៉ាស៊ីហ្វិក នៃអង្គការ សុខភាពពិភពលោក (WHO) ទទួលស្គាល់ចំពោះវីរភាពដឹកនាំរបស់សម្ដេចតេជោក្នុងការប្រយុទ្ធប្រឆាំងជំងឺកូវីដ១៩
AKP ភ្នំពេញ ថ្ងៃទី៣០ ខែមិថុនា ឆ្នាំ២០២២ -- ឯកឧត្ដមឯកឧត្តម បណ្ឌិត Takeshi kasaiនាយកប្រចាំតំបន់អាស៊ីប៉ាស៊ីហ្វិក នៃអង្គការសុខភាពពិភពលោក (WHO) បានសម្ដែងនូវការគោរព និងទទួលស្គាល់ចំពោះវីរភាពដឹកនាំរបស់សម្ដេចតេជោក្នុងការប្រយុទ្ធប្រឆាំងជំងឺកូវីដ១៩។
នេះបើតាមការឱ្យដឹងរបស់ឯកឧត្តម អ៊ាង សុផល្លែត ជំនួយការសម្ដេចតេជោ បន្ទាប់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឱ្យឯកឧត្តម បណ្ឌិត Takeshi kasai នាយកប្រចាំតំបន់អាស៊ីប៉ាស៊ីហ្វិក នៃ អង្គការសុខភាពពិភពលោក (WHO) ចូលជួបសម្ដែងការគួរសម និងពិភាក្សាការងារ នាព្រឹកថ្ងៃទី៣០ ខែមិថុនា ឆ្នាំ២០២២ នៅវិមានសន្តិភាព។ ក្នុងជំនួបនោះ ឯកឧត្តម Takeshi kasai បានសម្ដែងនូវការគោរព និងទទួលស្គាល់ចំពោះវីរភាពដឹកនាំរបស់សម្ដេចតេជោក្នុងការដឹកនាំប្រយុទ្ធប្រឆាំងជំងឺកូវីដ១៩ ជាមួយនឹងកិច្ចប្រឹងប្រែងយ៉ាងយកចិត្តទុកដាក់ និងការប្រឹងប្រែងយ៉ាងសកម្ម របស់ឯកឧត្តមរដ្ឋមន្ត្រីក្រសួងសុខាភិបាល មន្ទីរសុខាភិបាល យុវជនស្ម័គ្រចិត្តនិងប្រជាជនកម្ពុជា។ ឯកឧត្តមក៏បានសម្ដែងនូវការអបអរសាទរជូនចំពោះសម្ដេចតេជោ និងរាជរដ្ឋាភិបាលកម្ពុជាដែលទទួលបានជោគជ័យក្នុងការទប់ស្កាត់ការរីករាលដាលជំងឺកូវីដ១៩។ ឯកឧត្តម Takeshi kasai បានធ្វើការកត់សម្គាល់នៅចំណុចចំនួន ៣ ដែលក្នុងនោះរួមមាន ទី១. កម្ពុជាដើរជាគំរូ នៅក្នុងក្របខ័ណ្ឌតំបន់ និងពិភពលោកក្នុងការចាក់វ៉ាក់សាំងជូនប្រជាជន។ ទី២. កម្ពុជាជាប្រទេស គំរូក្នុងការតាមដានវិភាគ និងឆ្លើយតបទាន់ពេលវេលា ទៅនឹងមុខសញ្ញារបស់ជំងឺកូវីដ១៩។ មិនតែប៉ុណ្ណោះបានចែករំលែកបទពិសោធន៍ដល់ប្រទេសដទៃផងដែរ។ ទី៣. ឯកឧត្តមមានសេចក្ដីរីករាយ និងថ្លែងអំណរគុណជាទីបំផុត ដែលកម្ពុជាបានទទួលកប៉ាល់ Westerdam ចូលចតនៅកម្ពុជា ដោយឯកឧត្ដមបានលើកឡើងថា ពេលនោះ មានកប៉ាល់ចំនួន ២៧ នៅលើសមុទ្រដែលមិនមានកន្លែងចូលចត។ នៅពេលដែលកម្ពុជាអនុញ្ញាតឱ្យកប៉ាល់ចូលចត ប្រទេសដទៃទៀត ក៏បានអនុញ្ញាតឱ្យកប៉ាល់ផ្សេងទៀតចូលចតផងដែរ។ ឯកឧត្តមមានប្រសាសន៍សង្កត់ធ្ងន់ថា កម្ពុជា ជាប្រទេសដែលបានជួយជីវិតរបស់ប្រជាជន ដែលជាប់នៅលើកប៉ាល់នាពេលនោះ។ ឯកឧត្តមបានមានប្រសាសន៍បន្ថែមទៀតថា ឯកឧត្តម ប្ដេជ្ញាចិត្តធ្វើការជាមួយប្រទេសទាំងអស់ ដើម្បីប្រយុទ្ធប្រឆាំងជំងឺកូវីដ១៩នឹងជំងឺដទៃទៀត ដូចជា ជំងឺគ្រុនចាញ់ ជំងឺថ្លើម ជំងឺលើសឈាម និងជំងឺដទៃទៀត រួមទាំងការទប់ទល់ការប្រើប្រាស់ថ្នាំជក់ផងដែរ។
ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណជូនចំពោះឯកឧត្តម ដែលបានរម្លឹកអំពីវឌ្ឍនភាពនៃការប្រយុទ្ធប្រឆាំងជំងឺកូវីដ១៩។ សម្ដេចតេជោនាយករដ្ឋមន្ត្រី បានចែករំលែកបទពិសោធន៍អំពីការចាក់វ៉ាក់សាំងជូនប្រជាពលរដ្ឋ តាមរយៈអភិក្រមផ្ការីក ហើយនៅពេលនេះ កម្ពុជា កំពុងលើកទឹកចិត្តឱ្យប្រជាពលរដ្ឋចាក់ដូសជំរុញ ព្រោះថាការចាក់ត្រឹមតែដូសមូលដ្ឋាន គឺមិនគ្រប់គ្រាន់សម្រាប់ទប់ស្កាត់ជំងឺកូវីដ១៩នោះទេ។ សម្ដេចនាយករដ្ឋមន្ត្រីមានប្រសាសន៍បន្តថា ចំពោះការចុះចតកប៉ាល់ Westerdam ប្រសិនបើកម្ពុជា មិនឱ្យចូលចតទេ ពេលនោះប្រជាជននៅលើកប៉ាល់ និងអាចស្លាប់ ដោយសារអស់ទឹក អស់ស្បៀង នៅពេលដែលអ្នកនៅលើកប៉ាល់នោះ បើទោះបីមិនមានជំងឺកូវីដ19 ក៏ដោយ។ សម្តេចតេជោបានមានប្រសាសន៍បន្ថែមថា ការអនុញ្ញាតឱ្យកប៉ាល់ Westerdam ចូលចត គឺជាទឹកចិត្តមនុស្សធម៌របស់កម្ពុជា ដែលមិនរារែក ទោះបីមានហានិភ័យក៏ដោយ៕
ដោយ ជឹម ណារី