AKP ភ្នំពេញ ថ្ងៃទី១៣ ខែមិថុនា ឆ្នាំ២០២២ -- សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ជំរុញឱ្យគ្រប់ភាគីពាក់ព័ន្ធធ្វើយ៉ាងណា រួមគ្នាបន្តខិតខំរក្សាស្ថិរភាព​ម៉ាក្រូ​សេដ្ឋកិច្ចឱ្យបានល្អ ទប់ស្កាត់អតិផរណា និងត្រូវរក្សាឱ្យបាននូវកម្លាំងទិញនៃ​ប្រាក់​រៀលជាតិ ដើម្បីទប់ស្កាត់នឹងវិបត្តិសេដ្ឋកិច្ចសកល ដែលកើតចេញពីវិបត្តិកូវីដ-១៩ និង​សង្គ្រាមរុស្ស៉ី-អ៊ុយក្រែន ដែលកំពុងបន្តអូសបន្លាយនោះ។

ក្នុងពិធីបិទវគ្គបណ្ដុះបណ្ដាលឆ្នាំ២០២០-២០២១ និងបើកវគ្គបណ្ដុះបណ្ដាល ឆ្នាំ​២០២២ ដល់និស្សិតសាលាភូមិន្ទរដ្ឋបាលជាង២០០០នាក់ នាព្រឹកថ្ងៃទី១៣ ខែមិថុនា ឆ្នាំ២០២២ នៅមជ្ឈមណ្ឌលសន្និសីទនិងពិព័រណ៍ជ្រោយចង្វារ ស្ថិតក្នុងខណ្ឌជ្រោយចង្វារ រាជធានីភ្នំពេញ សម្ដេចតេជោ ហ៊ុន សែន បានថ្លែងថា «ត្រូវត្រៀមខ្លួនទទួលយកការពិត នូវ​បញ្ហាសេដ្ឋកិច្ចថមថយ ផ្តើមចេញពីកូវីដ-១៩ និងសង្គ្រាមរវាងរុស្ស៊ី-អ៊ុយក្រែន ដូច្នេះរួប​រួម​គ្នារក្សា ស្ថេរភាពម៉ាក្រូសេដ្ឋកិច្ច ទប់ស្កាត់អតិផរណា និងរក្សាកម្លាំងទិញនៃប្រាក់​រៀល​ឱ្យបានល្អ»។ សម្ដេចតេជោថ្លែងបន្ដថា សេដ្ឋកិច្ចកម្ពុជា កំពុងតែរើបឡើងវិញ បន្ទាប់ពី​កូវីដ-១៩ ប៉ុន្ដែមិននឹកស្មានថា សង្គ្រាមរវាង រុស្ស៊ី-អ៊ុយក្រែន បានចាប់ផ្ដើមដាក់បន្ទុក ទៅ​លើប្រទេសនានា ក្នុងពិភពលោក។

សម្ដេចតេជោគូសបញ្ជាក់ថា «យើងត្រូវត្រៀម ខ្លួនទទួលយកនូវការពិតមួយ ស្តីពី​បញ្ហាសេដ្ឋកិច្ចថមថយ ផ្តើមចេញពីកូវីដផង និងផ្ដើមចេញសង្គ្រាម នៅអ៊ុយក្រែនផង ។ រឿងនេះ គឺជារឿងដែលត្រូវរួមគ្នាខិតខំ ដើម្បីរក្សាស្ថិរភាពម៉ាក្រូសេដ្ឋកិច្ច ឱ្យបានល្អ ទប់​ស្កាត់​អតិផរណា រក្សាកម្លាំងទិញនៃប្រាក់រៀល»។ សម្ដេចតេជោបន្ដថា ចំពោះបញ្ហាសេដ្ឋ​កិច្ច​កម្ពុជា នាពេលបច្ចុប្បន្ននេះ តាមការវាយតម្លៃ របស់ធនាគារពិភពលោក ធនាគារ​អភិវឌ្ឍន៍​អាស៊ី និង មូលនិធិរូបិយវត្ថុអន្ដរជាតិ(IMF) មានភាពខុសៗគ្នា ប៉ុន្ដែសម្ដេច ក៏បាន​ប្រាប់សហការីថា «កុំខ្វល់ រឿងបញ្ហាវាយតម្លៃ សំខាន់បំផុត យើងធ្វើបានប៉ុន្មាន​ពិត​ប្រាកដ»។

 សម្ដេចតេជោគូសបញ្ជាក់បន្ថែមថា ការខិតខំរបស់កម្ពុជា ដើម្បីរក្សានូវស្ថិរភាព​ម៉ាក្រូសេដ្ឋកិច្ច ទប់ស្កាត់អតិផរណា រក្សាកម្លាំងទិញនៃប្រាក់រៀល គឺត្រូវតែបន្ដទៀត ពិសេស​បន្ដរក្សា សន្សំសំចៃឱ្យបានខ្ពស់ ដើម្បីទប់ទល់ជាមួយសភាពការណ៍ ដែលបាន​កំពុងកើត។ សម្ដេចតេជោបានថ្លែងទទួលស្គាល់ថា សេដ្ឋកិច្ចកម្ពុជា មិនទាន់ដល់ហានិភ័យ នៃការដួលរលំនោះទេ ដោយក្នុងរយៈពេល៣ខែ ដើមឆ្នាំ២០២២ កម្ពុជានាំចេញទៅក្រៅ​ប្រទេស កើនឡើង៣ភាគរយ។ ដោយឡែក វិស័យកសិកម្ម ស្រូវ ចិញ្ចឹមសត្វ សម្រាប់ផ្គត់​ផ្គង់ នៅកម្ពុជានៅមាន។ សម្ដេចតេជោថ្លែងបន្ថែមថា វិបត្តិស្បៀង នឹងក្លាយជាវិបត្តិ​សកល​តែម្ដង ក្រោយពីសង្គ្រាមរវាង រុស្ស៊ី-អ៊ុយក្រែន កំពុងកើតមានឡើង។​សម្តេចតេជោប្រមុខ​រាជ​រដ្ឋាភិបាលក៏បានជំរុញឱ្យមានការសន្សំសំចៃនូវចំណូលថវិកាជាតិ ដើម្បីត្រៀមទុកជា​មុននូវ​សភាពការណ៍ ឬវិបត្តិផ្សេងៗ ដែលអាចកើតមានឡើង មិនអាចវាយតម្លៃដឹងមុន។

  គួរបញ្ជាក់ដែរថា ធនាគារពិភពលោកទើបចេញផ្សាយរបាយការណ៍ព្យាករណ៍​សេដ្ឋកិច្ចសេដ្ឋកិច្ចកម្ពុជាថា នៅឆ្នាំ២០២២នេះនឹងមានកំណើន ៤,៥ភាគរយ និងឆ្នាំ​២០២៣ កើនត្រឹម៥,៨ភាគរយ ខណៈរាជរដ្ឋាភិបាលកម្ពុជារំពឹងថា សេដ្ឋកិច្ចនឹងកើតឡើង​៥,២ភាគរយ សម្រាប់ឆ្នាំ២០២២។ សម្រាប់ធនាគារអភិវឌ្ឍន៍អាស៊ី (ADB) វិញ ព្យាករណ៍ថា សេដ្ឋកិច្ចកម្ពុជានឹងហក់ឡើង៥,៣ភាគរយ ក្នុងឆ្នាំនេះ និង៦,៥ភាគរយ ក្នុងឆ្នាំ២០២៣ ខណៈមូលនិធិរូបិយវត្ថុអន្តរជាតិ រំពឹងថាកើនឡើងរង្វង់ ៥,១ភាគរយ និងឆ្នាំ២០២៣ នឹងមានកំណើនខ្ពស់ក្នុងអត្រា ៦,២ភាគរយ៕

ដោយ ជឹម ណារី