AKP ភ្នំពេញ ថ្ងៃទី១១ ខែមេសា ឆ្នាំ២០២២ -- ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុម​ការ​ងារជំនាញអញ្ជើញមកការពារសេចក្តីព្រាងច្បាប់ ស្តីពី "ការការពាររុក្ខជាតិ និងភូតគាម​អនាម័យ" ជាមួយគណៈកម្មការទី៣ និងគណៈកម្មការជំនាញផ្សេងទៀតនៃព្រឹទ្ធសភា ដែល​ដឹកនាំដោយឯកឧត្តមបណ្ឌិត ម៉ុង ឫទ្ធី ប្រធានគណៈកម្មការទី៣ នៃព្រឹទ្ធសភា។ ក្នុង កិច្ច​ប្រជុំនេះ បានធ្វើឡើង នាព្រឹកថ្ងៃចន្ទ ១០កើត ខែចេត្រ ឆ្នាំឆ្លូវ ត្រីស័ក ព.ស ២៥៦៥ ត្រូវ នឹងថ្ងៃទី១១ ខែមេសា ឆ្នាំ២០២២ នៅវិមានព្រឹទ្ធសភា ។ នេះបើតាមការបញ្ជាក់របស់​ឯកឧត្ដម វេង សាខុន តាមរយៈផេកហ្វេសប៊ុកផ្លូវការ។

ឯកឧត្តម វេង សាខុន បានថ្លែងអំណរគុណយ៉ាងជ្រាលជ្រៅជូនចំពោះ​សម្តេចវិបុល​សេនា​ភក្តី សាយ ឈុំ ប្រធានព្រឹទ្ធសភា ដែលបានអនុញ្ញាតឱ្យដាក់សេចក្តីព្រាងច្បាប់​នេះ​នៅក្នុងរបៀបវារៈ នៃកិច្ចប្រជុំនាថ្ងៃនេះ ដើម្បីស្នើសុំពិនិត្យ និងអនុម័តដ៏ខ្ពង់ខ្ពស់។ ឯកឧត្តម​រដ្ឋមន្ត្រី បានជម្រាបជូនអង្គប្រជុំថាសេចក្តីព្រាងច្បាប់នេះគឺជាសមិទ្ធផលថ្មីមួយ​ទៀត​ក្នុងចំណោមសេចក្តីព្រាងច្បាប់ផ្សេងទៀត ដែលក្រសួងកសិកម្ម រុក្ខាប្រមាញ់ និង​នេសាទ បានខិតខំកសាងឡើងដើម្បីទុកជាឧបករណ៍គតិយុត្តសម្រាប់ធ្វើការអភិវឌ្ឍ​វិស័យ​កសិកម្ម។ ទន្ទឹមនេះ ឯកឧត្តមរដ្ឋមន្ត្រីបានជម្រាបជូនឯកឧត្តមបណ្ឌិតប្រធានគណៈ​កម្មការ​ទី៣ ព្រមទាំងសមាជិក គណៈកម្មការផ្សេងទៀតអំពីប្រវត្តិនៃដំណើរការ​រៀបចំសេចក្តីព្រាង​ច្បាប់នេះយ៉ាងលម្អិតជាបន្តបន្ទាប់ និងស្របទៅតាមនិន្នាការនៃការវិវត្ដរីកចម្រើនរបស់​ប្រទេស​ជាតិ ឆ្លើយតបតាមអនុសញ្ញាអន្ដរជាតិស្តីពី "ការការពាររុក្ខជាតិ" និងកាតព្វកិច្ចក្នុង​នាមប្រទេសជាសមាជិកអង្គការពាណិជ្ជកម្មពិភពលោក(WTO) និងលក្ខខណ្ឌតម្រូវ​ភូតគាម​អនាម័យនៃទីផ្សារនាំចេញ និងនាំចូលកសិផល និងរុក្ខជាតិមកក្នុងព្រះរាជាណា​ចក្រ​កម្ពុជា។

យោងលើសេចក្តីត្រូវការចាំបាច់អំពីឯកសារគតិយុត្តរបស់រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និងនេសាទជាសេនាធិការ ចាំបាច់ និងជា​បន្ទាន់​ត្រូវបង្កើត​ច្បាប់ស្តីពី "ការការពាររុក្ខជាតិ និងភូតគាមអនាម័យ" នេះឡើង។ ដោយទទួល​បាន​ការសហការ និងគាំទ្រពីគ្រប់ក្រសួង-ស្ថាប័នពាក់ព័ន្ធ គណៈរដ្ឋមន្រ្តី គណៈកម្មការ​ទី៣ និងគណៈកម្មការផ្សេងៗទៀតនៃរដ្ឋសភា និងសម័យប្រជុំពេញអង្គរដ្ឋសភាលើកទី៧ នីតិកាលទី៦ ហើយបានមកដល់គណៈកម្មការទី៣ និងសមាជិកគណៈកម្មការជំនាញផ្សេង ទៀតនៃព្រឹទ្ធសភា ដែលឯកឧត្តម និងលោកជំទាវកំពុងពិនិត្យ និងពិភាក្សានាពេលនេះ។

សេចក្តីព្រាងច្បាប់នេះត្រូវគណៈកម្មការទី៣ និងសមាជិកគណៈកម្មការជំនាញផ្សេងទៀត នៃព្រឹទ្ធសភា បានធ្វើការពិនិត្យ ពិភាក្សា និងលើកជាសំណួរក្នុងន័យស្ថាបនាដែល​ផ្តល់​ធាតុ​ចូល សំខាន់ៗសម្រាប់ជាមូលដ្ឋានគ្រឹះ បំពេញបន្ថែមទាំងខ្លឹមសារបច្ចេកទេស និង​មូល​ដ្ឋានគ្រឹះគតិយុត្ត។

ជាមួយគ្នានេះ ឯកឧត្តមរដ្ឋមន្ត្រី វេង សាខុន បានថ្លែងអំណរគុណ ចំពោះឯកឧត្តម​ ប្រធានគណៈកម្មការទី៣ ឯកឧត្តម លោកជំទាវ សមាជិក សមាជិកា ដែលបានចំណាយ​ពេលដ៏មានតម្លៃធ្វើការពិនិត្យ និងពិភាក្សាយ៉ាងល្អិតល្អន់លើឯកសារសេចក្តីព្រាងច្បាប់នេះ ហើយបានអនុម័តយល់ព្រមតាមសំណើរបស់រាជរដ្ឋាភិបាល ដាក់សេចក្តីព្រាងច្បាប់ស្តីពី "ការការពាររុក្ខជាតិ និងភូតគាមអនាម័យ" ចូលក្នុងរបៀបវារ:ក្នុងសម័យប្រជុំព្រឹទ្ធ​សភា​លើកទី៨ នីតិកាលទី៤ ខាងមុខនេះ៕

ដោយ រិទ្ធី