AKP ភ្នំពេញ ថ្ងៃទី២៩ ខែមីនា ឆ្នាំ២០២២ -- ថ្លែងនៅក្នុងឱកាសអញ្ជើញជាអធិបតីពិធីបើកសិក្ខាសាលាផ្សព្វផ្សាយលទ្ធផលគម្រោង «ការប្រើប្រាស់បច្ចេកវិទ្យា សម្រាប់ដំណើរការមន្ទីរពេទ្យឆ្លាតវៃបៃតង» នាព្រឹកថ្ងៃទី២៩ ខែមីនា ឆ្នាំ២០២២ ជាមួយនឹងឯកឧត្តម Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានមានប្រសាសន៍ថា រាជរដ្ឋាភិបាលកម្ពុជា កំពុងតែផ្តោតការយកចិត្តទុកដាក់ខ្ពស់ក្នុងការទំនើបកម្មបច្ចេកវិទ្យាឌីជីថល នៅតាមមន្ទីរពេទ្យរដ្ឋ និងឯកជន។

លោកជំទាវ បានបន្ថែមថា ៖ “ការប្រើប្រាស់បច្ចេកវិទ្យាសម្រាប់ដំណើរការមន្ទីរពេទ្យវៃឆ្លាតបៃតង គឺសំដៅចូលរួមចំណែកនៅក្នុងការធ្វើទំនើបកម្មបច្ចេកវិទ្យាឌីជីថលនៅក្នុងវិស័យសុខាភិបាលកម្ពុជា ហើយក៏ជាការបោះជំហានជាវិជ្ជមានមួយទៀតនៅក្នុងការរួម ចំណែកអនុវត្តផែនការយុទ្ធសាស្ត្រសុខាភិបាលជាតិ ដែលបាននិងកំពុងតែផ្តោតការយកចិត្តទុកដាក់ខ្ពស់ លើការធ្វើទំនើបកម្មបច្ចេកវិទ្យាឌីជីថលនៅតាមមន្ទីរពេទ្យរដ្ឋ និងឯកជន ក្រោមការចង្អុលបង្ហាញប្រកបដោយទស្សនៈវែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា”។

ដំណើរការគម្រោង “ការប្រើប្រាស់បច្ចេកវិទ្យាសម្រាប់ដំណើរការមន្ទីរពេទ្យវៃឆ្លាតបៃតង” ក្នុងផ្នែកឯកជន នៅកម្ពុជា ដោយកម្មវិធីពេទ្យយើង តាមរយៈជំនួយហិរញ្ញវត្ថុរបស់គម្រោងភាពជាដៃគូទីក្រុងវៃឆ្លាតបៃតងរបស់សហរដ្ឋអាមេរិក គឺជាចំណែកមួយក្នុងការបង្កើនសក្តានុពលដ៏វិសេសវិសាលទៅលើការផ្តល់សេវាពិគ្រោះ និងព្យាបាល ជំងឺតាមបែបឌីជីថល ជូនដល់បងប្អូនប្រជាពលរដ្ឋដែលប្រើប្រាស់សេវាមន្ទីរពេទ្យឯកជន និងជាការចូលរួមចំណែកមួយផងដែរ នៅក្នុងការអភិវឌ្ឍវិស័យសុខាភិបាលកម្ពុជាតាមបែបឌីជីថល។ គម្រោងនេះ បានជួយដល់មន្ទីរពេទ្យឯកជននៅក្នុងរាជធានីភ្នំពេញ ខេត្តបាត់ដំបង និងខេត្តសៀមរាប ឱ្យដំណើរការគ្រប់គ្រងសេវាព្យាបាលជំងឺបែបឌីជីថល និងនាំឱ្យមន្ទីរពេទ្យ និងគ្លីនិកឯកជនទាំងអស់នោះ មានតួនាទី មិនត្រឹមតែជាអ្នកផ្តល់សេវា ប្រកបដោយការទទួលខុសត្រូវនោះទេ ប៉ុន្តែបានក្លាយជាមន្ទីរពេទ្យ និងគ្លីនិកមានការទទួលខុសត្រូវចូលរួមកសាងទីក្រុងបៃតង និងបរិស្ថាន ស្អាតទៀតផង។

លោកជំទាវ ឱ វណ្ណឌីន បានបន្ថែមផងដែរថា ការប្រើប្រាស់បច្ចេកវិទ្យាឌីជីថលទំនើប សម្រាប់លើកកម្ពស់គុណភាពសេវាសុខាភិបាល ជាចំណុចដ៏សំខាន់មួយ ដែលត្រូវបានរាប់បញ្ចូល គិតគូរ និងផ្ដួចផ្ដើមនៅក្នុងគោលនយោបាយយុទ្ធសាស្ត្ររបស់ក្រសួងសុខាភិបាល នៃព្រះរាជាណាចក្រកម្ពុជា ហើយក្រសួងសុខាភិបាល ក៏កំពុងតែគាំទ្រ និងជំរុញលើកទឹកចិត្តឱ្យមានការចូលរួមឱ្យបានពេញលេញពីគ្រប់ភាគីពាក់ព័ន្ធ ទាំងស្ថាប័នរដ្ឋ វិស័យឯកជន និងអង្គការដៃគូនានាទាំងអស់ផងដែរ។

ដោយហេតុថាបច្ចុប្បន្ននេះ កម្ពុជាយើងកំពុងស្ថិតក្នុងយុគសម័យឧស្សាហកម្ម ៤.០ បច្ចេកវិទ្យាឌីជីថល គឺជារឿងសំខាន់មួយ ក្នុងការជួយសម្រួលដល់ការធ្វើឱ្យបានល្អប្រសើរឡើងនូវគុណភាពការងារសង្គម និងពាណិជ្ជកម្មផ្សេងៗ ព្រមទាំងចូលរួមក្នុងការអភិវឌ្ឍប្រទេសជាតិ។ ដូច្នេះបច្ចេកវិទ្យា ៤.០ ជាគន្លឹះ និងជាផ្នែកមួយដែលក្រសួងសុខាភិបាល បានយកចិត្តទុកដាក់ខ្ពស់ រហូតដល់បង្កើតឱ្យមានក្រុមការងារបច្ចេកវិទ្យាឌីជីថលសុខាភិបាល តាំងពីមុនមានការរាតត្បាតជំងឺកូវីដ-១៩មកម្ល៉េះ។ ការងារបច្ចេកវិទ្យាឌីជីថលនេះ ក៏បានជួយដល់វិស័យសុខាភិបាលកម្ពុជាយ៉ាងធំធេង ក្នុងការធ្វើទំនើបកម្មសេវា បន្តអភិវឌ្ឍវិស័យសុខាភិបាល ពង្រឹងគុណភាពប្រព័ន្ធសុខាភិបាល សំដៅផ្តល់សេវាសុខាភិបាលប្រកដោយតម្លាភាព គុណភាព ប្រសិទ្ធិភាព និងជួយលើកស្ទួយដល់សុខមាលភាពប្រជាជនកម្ពុជា ព្រមទាំងចូលរួមចំណែកក្នុងការគ្រប់គ្រងបានល្អប្រសើរនូវដំណើរការសេវាសុខាភិបាលបែបឌីជីថល ទាំងមន្ទីរពេទ្យរដ្ឋ និងឯកជន។ បច្ចេកវិទ្យាឌីជីថលនេះ ជាកត្ដាលិករដែលជំរុញឲ្យការ គ្រប់គ្រងឯកសារវេជ្ជសាស្ត្រនានា កាន់តែមានភាពងាយស្រួល ជឿនលឿន និងគ្រប់ជ្រុងជ្រោយ។

ជាមួយគ្នានេះ ក្នុងបរិបទនៃប្រយុទ្ធនឹងជំងឺកូវីដ-១៩ ការប្រើប្រាស់បច្ចេកវិទ្យាឌីជីថលក្នុងការគ្រប់គ្រង និងតាមដានជំងឺ កាន់តែមានសារៈសំខាន់ទៅទៀត និងជាដំណោះស្រាយចាំបាច់ ខណៈដែលពិភពលោក ក៏ដូចជាប្រទេសកម្ពុជាយើង ត្រូវអនុវត្តវិធានការការពារការចម្លងក្នុងទ្រង់ទ្រាយធំនៅក្នុងសហគមន៍ ជាពិសេសនៅក្នុងការពិនិត្យព្យាបាលជំងឺកូវីដ-១៩ ការអនុវត្តវិធានការ ៣ការពារ និង៣កុំ និងការជំរុញការចាក់វ៉ាក់សាំងកូវីដ-១៩ នៅពេលដល់វេនចាក់ឱ្យបានទាន់ពេលវេលា។ នៅក្នុងមន្ទីរពេទ្យ ការប្រើប្រាស់បច្ចេកវិទ្យាឌីជីថល គឺអាចឱ្យរក្សាគម្លាតនៃការជួបជុំគ្នាបាន មិនប្រមូលផ្តុំយូរ ដោយអ្នកទទួលសេវាអាចណាត់ជួបទុកជាមុនៗមកទទួលសេវា ហើយគ្រូពេទ្យនឹងផ្តល់សេវាទៅតាមផែនការដែលបានណាត់ជួបជាមុន។ ម្យ៉ាងវិញទៀត ក្នុងករណីអ្នកជំងឺដែលត្រូវការត្រឹមតែសេវាពិគ្រោះ និងព្យាបាលបឋម អ្នកជំងឺអាចជួបពិគ្រោះជាមួយវេជ្ជបណ្ឌិត និងអ្នកផ្តល់សេវាពីចម្ងាយលើទូរស័ព្ទដៃ (Teleconsultation) បានផងដែរ។ ទាំងនេះហើយ គឺអាចចូលរួមចំណែកដល់ការកាត់បន្ថយហានិភ័យនៃការឆ្លងវីរុសកូវីដ-១៩ ឬជំងឺឆ្លងផ្សេងៗ នៅពេលមកទទួលសេវា កកកុញ ហើយខ្វះខាតនូវការប្រុងប្រយ័ត្ន មិនបានអនុវត្តបានត្រឹមត្រូវនូវវិធានការការពារខ្លួន ហើយការផ្តល់សេវាក៏មានភាពរលូន ព្រមទាំងចំណេញពេលវេលា ហើយងាយស្រួលសម្រាប់អ្នកជំងឺ និងអ្នកផ្តល់សេវាផងដែរ។

ទន្ទឹមនឹងនេះ ក្រសួងសុខាភិបាល តែងតែលើកទឹកចិត្តឱ្យមន្ទីរពេទ្យរដ្ឋ និងឯកជន ឱ្យដំណើរការតាមបែបឌីជីថល ហើយក្រសួង ក៏បានដាក់ឱ្យដំណើរការកម្មវិធីឌីជីថលមួយចំនួនរួចមកហើយដែរ ដូចជា ប្រព័ន្ធចុះឈ្មោះអ្នកមក ទទួលសេវា (PMRS) ប្រព័ន្ធគ្រប់គ្រងព័ត៌មានសុខាភិបាល (HIS) ប្រព័ន្ធគ្រប់គ្រងឱសថ ប្រព័ន្ធគ្រប់គ្រងព័ត៌មានមន្ទីរពិសោធន៍វេជ្ជសាស្ត្រជាតិ (CamLIS) និងប្រព័ន្ធគ្រប់គ្រងហិរញ្ញប្រទានសុខាភិបាលជាដើម ដែលសមស្របទៅនឹងគោលនយោបាយយុទ្ធសាស្ត្រសុខាភិបាលជាតិរបស់យើងដែរ។

ក្នុងឱកាសនោះ លោកជំទាវ បានថ្លែងអំណរគុណដល់សហរដ្ឋអាមេរិក និងប្រជាជនសហរដ្ឋអាមេរិក តាមរយៈឯកឧត្តម Patrick Murphy ដែលបានផ្តល់ជាជំនួយគាំទ្រដល់ វិស័យសុខាភិបាលរបស់កម្ពុជា ជាពិសេសបានជួយផ្ដល់ជាសម្ភារ បរិក្ខាពេទ្យ និងវ៉ាក់សាំងកូវីដ-១៩ ដើម្បីរួមចំណែកក្នុងការប្រយុទ្ធនឹងជំងឺកូវីដ-១៩ នៅកម្ពុជា៕

ដោយ ផែន រតនៈ