AKP ភ្នំពេញ ថ្ងៃទី២៨ ខែមីនា ឆ្នាំ២០២២ -- លោកជំទាវ​ Pauline Tamesis អ្នកសម្របសម្រួលអង្គការសហប្រជាជាតិប្រចាំនៅកម្ពុជា បានវាយតម្លៃខ្ពស់ចំពោះសមិទ្ធផលសម្រេចបានសម្រាប់វិស័យមីនក្នុងអាណតិ្តបេសកកម្មរបស់​លោកជំទាវ​នៅកម្ពុជា។ ការលើកឡើងរបស់អ្នកសម្របសម្រួលអង្គការសហ​ប្រជា​ជាតិ​​ប្រចាំនៅកម្ពុជានេះ ក្នុងឱកាសជួបសម្ដែងការគួរសម និងជម្រាបលាជាមួយ​ឯកឧត្ដម​ទេសរដ្ឋមន្រ្ដី លី ធុជ អនុប្រធានទី១ អាជ្ញាធរមីន ក្នុងខណៈដែល​លោក​ជំទាវ​បញ្ចប់​អាណត្តិ​​បេសកកម្ម​រយៈ​ពេល​ ០៤​ឆ្នាំ​នៅ​កម្ពុជា នាព្រឹកថ្ងៃទី២៨ ខែមីនា ឆ្នាំ២០២២ នៅទីស្នាក់ការអាជ្ញាធរមីន​។ នេះបើតាមការបញ្ជាក់តាមរយៈផេកហ្វេកប៊ុកផ្លូវការ​របស់​ឯកឧត្ដមទេសរដ្ឋមន្រ្ដី លី ធុជ។

ក្នុងឱកាសនោះ លោកជំទាវ​ Pauline Tamesis បានសម្តែងនូវការអបអរសាទរ ចំពោះការដឹកនាំរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានធ្វើឱ្យប្រទេសជាតិមានការអភិវឌ្ឍលើគ្រប់វិស័យ និងធ្វើឱ្យកម្ពុជា​មាន​​ការប្រែប្រួលមុខមាត់ខ្លាំង ដែលលោកជំទាវបានមើលឃើញយ៉ាងច្បាស់ក្នុងអាណត្តិ​បេសកកម្ម​របស់លោកជំទាវ​នៅកម្ពុជា។ លោកជំទាវ​បានកោតសរសើរចំពោះសមិទ្ធ​ផល​សម្រេចបានសម្រាប់វិស័យមីនកម្ពុជា ក្រោមការងារសម្របសម្រួល និងដឹកនាំរបស់​អាជ្ញាធរ​មីន។ ជាមួយគ្នានេះ លោកជំទាវ​បានបញ្ជាក់ថា នឹងបន្តចូលរួមជាមួយរាជរដ្ឋាភិ​បាល​ក្នុងវិស័យសកម្មភាពមីននៅកម្ពុជា និងបន្តកៀរគរធនធានគាំទ្រដល់គោលដៅរបស់​កម្ពុជារហូតដល់ឆ្នាំ២០២៥។

លោកជំទាវ​បានវាយតម្លៃចំពោះការយកចិត្តទុកដាក់របស់រាជរដ្ឋាភិបាលកម្ពុជា ដែលបានដាក់ចេញនូវចក្ខុវិស័យដឹកនាំយ៉ាងច្បាស់លាស់ ដោយបានដាក់​បញ្ចូលការងារ​សកម្មភាពមីនក្នុងគោលដៅទី១៨ នៃការអភិវឌ្ឍប្រកបដោយចីរភាព និងគោលនយោ​បាយសំខាន់ៗសម្រាប់អភិវឌ្ឍន៍ជាតិ។

ឯកឧត្ដមទេសរដ្ឋមន្រ្ដី លី ធុជ ក្នុងនាមរាជរដ្ឋាភិបាលកម្ពុជា បានថ្លែងអំណរ​គុណ​ដល់លោកជំទាវ Pauline Tamesis ដែលបានផ្តល់នូវភាពជាមិត្ត ជាដៃគូ និងកិច្ច​សហ​ប្រតិបត្តិការយ៉ាងល្អជាមួយរាជរដ្ឋាភិបាល និងប្រជាជនកម្ពុជា ព្រមទាំងបានគាំទ្រដល់កិច្ច​ដំណើរការថែរក្សាសន្តិភាព ក៏ដូចជាការងារបោសសម្អាតមីន ក្នុងអាណត្តិបេសកកម្មរបស់​លោកជំទាវ។

ឯកឧត្ដមទេសរដ្ឋមន្រ្ដីបានអះអាងថា ចាប់តាំងពីផ្តើមដំណើរបេសកកម្មរបស់​​លោក​ជំទាវអ្នកសម្របសម្រួល UN ប្រចាំនៅកម្ពុជា តាំងពីឆ្នាំ២០១៨ លោកជំទាវ​បានចូលរួមគាំ​ទ្រ​ដល់ការរៀបចំសន្និបាតជាតិសកម្មភាពមីន និងចូលរួមដល់ការរៀនបចំ​និងកសាង​នូវផែនការយុទ្ធសាស្រ្តជាតិសកម្មភាពមីន ២០១៨-២០២៥៕

ដោយ រិទ្ធី