AKP ព្រះសីហនុ ថ្ងៃទី១២ ​ខែកញ្ញា ឆ្នាំ២០២១--ឯកឧត្តម គួច ចំរើន អភិបាលនៃគណៈអភិបា លខេត្តព្រះសីហនុកាលពីថ្ងៃសៅរ៍៥កើតខែភទ្របទឆ្នាំឆ្លូវត្រីស័ក ព.ស ២៥៦៥ ត្រូវ​នឹ​ង​ថ្ងៃ​ទី​១​១​ខែកញ្ញាឆ្នាំ២០២១បានអញ្ជើញត្រួតពិនិត្យការអនុវត្តនីតិវិធីស្តង់ដារប្រតិបត្តិ (SOP)ដើម្បីទ​ប់ស្កាត់ការឆ្លងរាលដាលជំងឺកូវីដ-១៩ នៅសាលាអនុវិទ្យាល័យទួលកែវ ស្ថិតនៅឃុំទឹកល្អក់ ស្រុកព្រៃនប់ ខេត្តព្រះសីហនុ ដើម្បីបើកឱ្យដំណើរការសាកល្បងឡើងវិញនៅថ្ងៃទី១៣ខែ​ក​ញ្ញា​​ឆ្នាំ២០២១ខាងមុខ។

យោងតាមសេចក្តីណែនាំរបស់ក្រសួងអប់រំ យុវជន និងកីឡា ស្តីពីការបង្រៀននិង​រៀន​តាម​ប​ណ្តុំ​សម្រាប់គ្រឹះស្ថានសិក្សាសាធារណៈ និងឯកជន ក្នុងភូមិសាស្ត្រខេត្តព្រះសីហនុដែលមាន​ហានិភ័យទាប ដើម្បីបើកសាលាសាកល្បងឡើងវិញ រដ្ឋបាលខេត្តព្រះសីហនុ​បាន​ជ្រើស​រើស​យក​សាលាដែលមានសុវត្ថិភាព និងរៀបចំសណ្តាប់ធ្នាប់បានល្អបើកដំណើរការសាកល្ប​ង​ប​ង្រៀ​ននិងរៀនឡើងវិញដោយផ្តោតសំខាន់លើថ្នាក់ទី៩និងថ្នាក់ទី១២ ចំនួន៥សាលានៅ​តា​ម​ក្រុងស្រុកទាំង៥ នៃខេត្តព្រះសីហនុ និងឈានទៅបើកសាលាផ្សេងៗទៀតក្នុងខេត្ត។

ការ​ជ្រើ​សរើសបើកដំណើរការសាកល្បងសាលាមានដូចជា ១. វិទ្យាល័យ កែវផុ​ស នៅស្រុ​ក​ស្ទឹ​ងហាវ ២. អនុវិទ្យាល័យ ទួលកែវ នៅស្រុកព្រៃនប់ ៣. វិ​ទ្យាល័​យ ហ៊ុន សែន មិត្តភាព នៅក្រុងព្រះសីហនុ ៤. អនុវិទ្យាល័យ ស្ទឹងសំរោង នៅស្រុកកំពង់សីលា ៥. អនុវិទ្យាល័យ ព្រែកស្វាយ នៅក្រុងកោះរ៉ុង។ 

ឯកឧត្តម គួច ចំរើន អភិបាលខេត្តព្រះសីហនុ មានប្រសាសន៍ណែ​នាំដល់​លោក​នា​យ​ក​សា​លា​ត្រូវរៀបចំម៉ាស៊ីនវ៉ាស់កម្តៅ អាល់កុល ឬជែល មានកន្លែង លាងសម្អាតដៃ រក្សា​គ​ម្លា​ត​សុ​វ​ត្ថិ​ភាព និងគម្លាតសង្គម នៅពេលចេញលេង កុំឱ្យសិស្សចេញពេលស្របគ្នា ត្រូវមានថ្នា​ក់​មួ​យ​ចេ​ញ និងថ្នាក់ផ្សេងទៀតអត់ ដើម្បីកាត់បន្ថយហានិភ័យនៃការចម្លងជំងឺកូវីដ-១៩ ។

ឯកឧត្តម អភិបាលខេត្ត បានបន្តទៀតថា លោកគ្រូ អ្នកគ្រូ ត្រូវមកមុនសិស្ស ដើម្បី​មើ​ល​កា​រ​ងា​រដោ​យទំនួលខុសត្រូវ មិនអាចឱ្យសិស្សមកមុនគ្រូនោះទេ។ បន្ទាប់មកឯកឧត្តម អភិបា​ល​ខេ​ត្ត​ ក៏បានឱ្យលោកអភិបាលស្រុករកជាងមកធ្វើការជួសជុលដំបូ​លអគា​រសា​លា​រៀ​ន​ឡើ​​ងវិញ​ដែ​​ល​រងការខូចខាត៕

ដោយ ងូ សុមុនី